Ынаҕы буоһатыыга үлэ күүскэ барыахтаах

Үлэ-хамнас сыыппара хараҕынан кэпсэнэр. Ол курдук, 2024 сыл тохсунньу 1 күнүнээҕи туругунан, Саха сиригэр тыа хаһаайыстыбатын салаатыгар ийэ сүөһү уопсай ахсаана былырыыҥҥыттан 3633 төбөнөн аччаабыт.

Ол курдук, бааһынай хаһаайыстыбаларга – 2153, онтон кэтэх ыалларга – 1760 төбөнөн, ол оннугар тэриллиилээх хаһаайыстыбаларга 290 төбөнөн эбиллибит.

“Сахаагроплем” СБТ  отделын зоотехнига Татьяна Протопопова этэринэн, 75229 ийэ сүөһүттэн 57603 ньирэй ылыллыбыт. Ол эбэтэр 78,58 % тэҥнэһэр. Ол курдук үчүгэй көрдөрүүлэри Амма (4847 ийэ сүөһүттэн — 89,6 % төрүөҕү), Мэҥэ Хаҥалас (7082 сүөһүттэн — 94,9  %), Ньурба (4995-тэн – 89,7 %)  ситиспиттэр. Хоту улуустартан Өймөкөөн (461-тэн 90,5 быр.), Дьааҥы (1071-тэн 87,9  %) үчүгэй көрдөрүүлээхтэр.

— Уопсайа  75229 ийэ сүөһү баар, мантан 45737  ынаҕы оҕуһунан уонна искусственнай сиэмэлээһининэн  хаптылар. Ынаҕы искусственнайдык буоһатыы былаанын толоруу 69,9 % тэҥнэстэ.  Бүлүү (46,3 % ), Горнай (41,0 %), Нам (52,8 %), Уус Алдан (57,4 %), Дьокуускай (54,8 %) мөлтөх көрдөрүүлээхтэр. Онон ийэ сүөһүнү искусственнайдык буоһатыыга үлэни күүскэ ыытыыга бары турунуох тустаахпыт, — диир Татьяна Протопопова.

Хаартысканы: Т.Протопопова тиксэрдэ.