Ынах, таба, биэ төбөтүгэр төлөбүр үрдээтэ

Быйыл тыа хаһаайыстыбатыгар оҥорон таһаарыыга муниципальнай тэриллиилэргэ уонна куораттар уокуруктарыгар 7,6 миллиард солкуобай көрүлүннэ. Бу былырыыҥҥыны кытары тэҥнээтэххэ, 16%-нан элбэх.

Бу үптэн 3 миллиард 840 мөлүйүөн солкуобайы 64 тыһыынча туонна үүтү ыаһыҥҥа уонна оҥорон таһаарыыга ыытыахтара. Киилэ үүт сыаната 50 солкуобайтан 60 солкуобайга диэри улаатта.

1 миллиард 458,6 мөлүйүөн солкуобай сүөһү иитэр кэтэх хаһаайыстыбалары өйүүргэ ыытыллар. Ынах төбөтүгэр төлөбүр 35 тыһыынча солкуобайтан 37 тыһыынчаҕа диэри улаатта.

587,6 мөлүйүөн солкуобайы Арктикатааҕы, хотугу уонна бырамыысыланнай оройуоннарга үүнээйини олордорго, сылгыны иитиигэ биэриэхтэрэ. Биир биэ төбөтүгэр төлөбүр 3 тыһыынчаттан 5 тыһыынча солкуобайга диэри улаатта.

815,5 туонна сүөһү, 300 туонна сылгы, убаһа этин, 4 736,3 туонна туорах бурдугу, 6 675 туонна хортуоппуйу, 2 870 оҕуруот аһын оҥорон таһаарарга 203,7 мөлүйүөн солкуобай көрүллэр.

1 миллиард 10,4 мөлүйүөн солкуобай табаны иитиигэ көрүллэр – биир таба төбөтүгэр төлөбүр 4 995,5 солкуобайтан 5 335,4 солкуобайга диэри улаатта.

Ил Дархан Айсен Николаев сорудаҕынан, тыа хаһаайыстыбатын үбүлээһин быйыл 2,6 миллиард солкуобайынан улаатан, 2023 сылга уопсайа 14,2 миллиард солкуобайга тэҥнэстэ (бу мантан 0,7 миллиард солкуобай федеральнай бүддьүөттэн кэлэр).

СӨ бырабыыталыстыбатын, Ил Дархан пресс-сулууспата.