Ынах төбөтүгэр көрүллэр үп оннунан хаалыахтаах диэтилэр

Олунньу 13 күнүгэр ситэриилээх былаас үһүс бөлөҕүн отчуота Уус Алдаҥҥа Дүпсүнтэн саҕаланна.

Отчуот буолуон иннинэ «Хаарбах дьиэттэн дьону көһөрүү» бырагырааманан үс этээстээх саҥа таас дьиэ үөрүүлээх аһыллыыта буолла.

Отчуот Дүпсүн култууратын дьиэтигэр ыытылынна. Былырыыҥҥы туруорсуу түмүгүнэн туох үлэ барбытый диэтэххэ, спортсааланы тутуу 2029-2030 сс. былааннаммыт, кэтэх дьиэлэри ититиигэ холбонууга эбии хочуоллары туруоруу, носуостары уларытыы, өрөмүөн, ыалга диэри тардарга турбалары атыылаһыы барыахтаах.
Быраас  амбулаториятын тутууга икки барыйаан баарын иһитиннэрдилэр.

Бу күннэргэ Дүпсүн дьоно биир кыһалҕаны көрүстүлэр. «Туймаада-нефть» кинилэргэ баар газозаправочнай ыстаансыйатын чааһынай киһиэхэ атыылаабыт. Бу чааһынай киһи, ороскуоттаах буоллаҕына, заправканы сабарга бэлэм. Дьиҥэр, бу заправканы олохтоох дьаһалта инвестбырагырааманан туттарбыт, бэйэлэрэ хааччыйбыттар, онон эбийиэк тоҕо чааһынай илиигэ барбытын утаралларын биллэрдилэр. Оннук ирдэбили боротокуолга киллэттэрдилэр.

Тыа хаһаайыстыбатыгар элбэх ыйытыы, туруорсуу киирдэ. Чуолаан ынах төбөтүгэр көрүллэр үбү — 39 тыһ. солк. оннунан хаалларары модьуйдулар. Гаврил Кудрин сири түүлэһиини хаттаан көрүөххэ наада диэтэ. Итиннэ улуус таһымыгар инвентаризация барыан наадатын, бас билиигэ сылдьар сири былдьаан ылыы олус уустугун быһаардылар.

Нэһилиэк оскуолата тымныытынан хапытаалынай өрөмүөнү төрөппүт кэмитиэтин бэрэссэдээтэлэ Прасковья Сивцева туруоруста. Тымныы оскуолаҕа оҕолор доруобуйаларын оҕустаралларын эттэ. Эмиэ маннык боппуруос култуура дьиэтигэр киирдэ. Култуура дьиэтин өрөмүөнүгэр куонкуруска кыайдахтарына, аны сайын өрөмүөн ыытыллыахтаах.

Дүпсүҥҥэ ааспыт сылга баһаарынай чаас, сайыҥҥы уу ситимэ тутуллубут. Нэһилиэккэ сүрүннээн ППМИ линиятынан сайдыы иннин диэки барар.
Төһө да мөккүөрдээх түгэннэр өрө күүрэн ылбыттарын иһин, нэһилиэнньэ бырабыыталыстыба үлэтин сөптөөҕүнэн сыаналаата.