Үҥкүү күрэһэ сэргэхситтэ

Атамайга сынньалаҥ киинин дьиэтигэр «Долгууна» үҥкүү ансаамбыла (сал. Алла Филипповна Павлова) тэриллибитэ 10 сыллаах үбүлүөйдээх киэһэтигэр анаммыт бэрт сэргэх тэрээһин буолла.

«ВОЗРАСТ ТАНЦАМ НЕ ПОМЕХА» диэн үҥкүү күрэхтэһиитэ үрдүк таһымнаахтык ыытылынна. Күөн күрэс дьүүллүр сүбэтигэр Горнай улууһун култуураҕа уонна духуобунай сайдыыга управлениетын начаалынньыга Быганова Вероника Николаевна, Атамайдааҕы сынньалаҥ киинин дириэктэрэ Яковлева Мария Дмитриевна, СӨ култууратын туйгуна, култуура бэтэрээнэ Петрова Марфа Николаевна, «Күндүүнэ» үҥкүү ансаамбыл салайааччыта, «Радуга» оҕо уһуйаанын муусукаҕа учуутала Аввакумова Юлиана Геннадиевна, «Атамайчаан» үҥкүү ансаамбылын салайааччыта, В.Д.Лонгинов аатынан Атамай орто оскуолатын үҥкүүгэ учуутала Ефремова Александра Анатольевна үлэлээтилэр.

Дьон-сэргэ долгуйа күүппүт күрэһигэр үҥкүү кэлэктииптэрэ кытыннылар. Барыта биэс кэлэктиип ох курдук оҥостон, кустук курдук куоһанан, үчүгэйдик бэлэмнэнэн кэлбиттэрэ тута биллэр. Өрөспүүбүлүкэ бары үҥкүүһүттэрэ мустубуттар дуу диэх курдук, бииртэн биир саҥа үҥкүү сыанаҕа тахсан истэ, ытыс тыаһынан арыалланан истэ. Таҥастара мааныта, бэйэлэрэ кэрэлэрэ, имигэстик хамсаналлара, үҥкүү кэрэ абылаҥар куустаран көтөн-дайан эрэр курдуктара көрөөччүлэри сөхтөрдө. Хас биирдии нүөмэри биир тыынынан көрдүбүт!

Күрэс икки түһүмэхтээх ыытылынна. Түмүк маннык буолла:

I истиэпэннээх дипломант — Маалтааныттан «Сардаана» үҥкүү ансаамбыла (сал. Игнатьева В.А);
III ист. лауреат — Солоҕонтон «Чараҥ» үҥкүү ансаамбыла (сал. Дормидонтова А.И);
II ист. лауреат — Бэрдьигэстээхтэн «Түһүлгэ» үҥкүү ансаамбыла (сал. Кириллина У.П);
I ист. лауреат — Октябрьскайтан «Күндүүнэ» үҥкүү ансаамбыла (сал. Корякина А.Х);

Күөн күрэс кылаан кыайыылааҕынан — Кэбээйи улууһун, Куокуй нэһилиэгиттэн кыттыбыт «Луҥха долгуннара» үҥкүү ансаамбыла буолла (сал. Еремеева Т.У, үҥкүүнү туруорааччы Полятинская С.Д.).
Үбүлүөйдээх «Долгууна» үҥкүү ансаамбылын ыҥырыылаах ыалдьыттар, тэрилтэ салайааччылара кэлэн эҕэрдэлээтилэр, махталларын биллэрдилэр. Бу курдук үҥкүүлэринэн кэрэхсэнэ туралларыгар баҕардылар.

Тэрээһин түмүгэр ыҥырыылаах ыалдьыттары, күрэс кыттааччыларын минньигэс толору астаах остуолга ыҥырдылар.

Уон сыл иһигэр “Долгууна” үҥкүү ансаамбыла үгүс ситиһиилэннэ, болҕомтону ылыан ылла. Биһиги кинилэргэ айар үлэ умсулҕаныгар уйдаран тулалыыр эйгэлэрин сырдыгынан толоро туралларыгар баҕарабыт. Бэйэ-бэйэни өйдөһөн, өйөһөн, түмсүүлээх кэлэктиип быһыытынан үүнүҥ-сайдыҥ диэн баҕа санаабытын тиэрдэбит. Салайааччыларыгар Алла Филипповна Павловаҕа айымньылаах үлэни, үрдүк ситиһиилэри.

Бу кэтэһиилээх дьоро киэһээ ыытылларыгар күүс-көмө, бигэ тирэх буолбут, тэбис-тэҥҥэ сүүрбүт-көппүт дьоммутугар, Атамай нэһилиэгин тыа сирин түөлбэтин баһылыгар Павлов А.Е. уонна олохтоох дьаһалта кэлэктиибигэр, чуолаан Розалия Габышеваҕа, Арфена Тимофееваҕа, Анна Жирковаҕа, Тамара Дмитриевнаҕа, Александр Максимовка, «Далбар Хотун» түмсүүгэ (сал. Иванова С.И) уонна «Тирэх» аҕам саастаах дьон түмсүүтүгэр (сал. Заровняева В.С), күөн күрэһи үҥкүүнэн киэргэппит «Атамайчаан» үҥкүү бөлөҕөр (сал. Ефремова А.А), ырыанан киэргэппит нэһилиэкпит биир чаҕылхай ыччатыгар Петр Жирковка, кэрэ куоластаах Быганова Вероника Николаевнаҕа барҕа махтал тылларын тиэрдэбит.

Анна Дмитриева,

Атамай, Горнай

Ааптар хаартыскалары тиксэрдэ