Үҥкүү национальнай тыйаатыра 45-с сезонун арыйда

Сергей Зверев-Кыыл Уолун аатынан Үҥкүү национальнай тыйаатыра Саха сирин национальнай култууратын киэн туттуутунан, хотугу өрөспүүбүлүкэ визитнэй карточкатынан буолар.

Тыйаатыр мэлдьи даҕаны төрүт култуураны, үгэстэри илдьэ сылдьарынан, үрдүк таһымнаах толорууларынан, чаҕылхай декорацияларынан, кэрэ көстүүлээх көстүүмнэринэн уо.д.а. биһирэтэр.
Үҥкүү тыйаатыра быйылгы 45-с сезонун киэҥ ис хоһоонноох бырагырааманан А.Пушкин аатынан  Нуучча тыйаатырын сыанатыгар арыйда. Кэнсиэр тыйаатыр аксакала, СӨ норуодунай артыыһа Дмитрий Артемьев алгыһын сиэринэн-туомунан арылынна.
Уос номоҕор сылдьар хореографтар: Сергей Зверев-Кыыл Уола, Аксения Посельская, Геннадий Баишев, Дора Филиппова, Афанасий Соловьев, Светлана Бессонова, Изабелла Егорова, эдэр туруорааччы Эдуард Жирков туруорууларыгар бастыҥ үҥкүүлэр көрөөччүнү кэрэхсэттилэр.
Ардыгар үҥкүү тыйаатырдарын үҥкүүлэри, үҥкүүнэн бүтүн испэктээктэри эрэ туруорар кэлэктиип курдук сыыһа санааччылар. Ол эрээри, кэлэктиип вокальнай өттүгэр үлэлиир артыыстардаах. Бу күн эдэр ырыаһыт, норуоттар икки ардыларынааҕы куонкурус дипломана Александр Карманов Кыыл Уолун «Ыччаппар» тойугун толоруута, Валерий Ноев матыыбыгар ырыалара, Бүтүн Арассыыйатааҕы уонна норуоттар икки ардыларынааҕы куонкурустар лауреттара Василена Шарина-Улан хомуска сыыйа тардан толоруута, СӨ култууратын туйгуна Владимир Боярскай баяҥҥа попуррита уо.д.а. дьоро күнү ситэрэн-хоторон биэрдилэр. Кэнсиэр РФ култууратын үтүөлээх үлэһитэ Николай Петров уонна СӨ култууратын туйгуна Анюта Иванова дирижердаах, Үҥкүү тыйаатырын иһинэн үлэлиир национальнай үнүстүрүмүөннэр оркестрдарын уонна СӨ үтүөлээх артыыската Анна Томская салайааччылаах «Кыл Саха» ансаамбыл доҕуһуолларынан барда.
Тыйаатыр Сергей Зверев «Оһуор» үҥкүүтүттэн хайа киһи нохтолоох сүрэҕэ долгуйбат буолуоҕай? Бу үҥкүү -– тыйаатыр сүрэҕэ да диэтэххэ, сыыһа буолбата буолуо.
Саха Өрөспүүбүлүкэтин үтүөлээх артыыстара Зоя уонна Афанасий Соловьевтар «Хотугу көстүүлэр» үҥкүүлэрэ тыйаатыр репертуарыттан сүппэт. Хотугу матыыптаах үҥкүүнү утумнааччылар Светлана Чирикова уонна Семен Дьяконов толорууларыгар эмиэ уратытык, сонуннук көһүннэ.
Кэнсиэркэ кэлбит үгүс көрөөччү тыйаатыр кэлэктиибэ А.Посельская аатынан балет оскуолатын бүтэрбит эдэр артыыстарынан эбиллэрин, саҥа туруоруулар элбииллэрин бэлиэтии көрдө. Ол курдук, балет артыыстарын толорууларыгар «Лаглайбаана», «Дэйбиирдээх үҥкүү», «Дьөһөгөй эйгэтэ» уо.д.а. ытыс тыаһынан көрүстүлэр.
Тыйаатыр 45-с сезонун арыйбыт кэнсиэр Геннадий Баишев туруоруутугар, Дмитрий Артемьев, Александр Карманов, Василена Шарина толорууларыгар оһуохайынан түмүктэннэ.
Аар-саарга аатырбыт Сергей Зверев аатынан Үҥкүү национальнай  тыйаатырын дууһаны сылаанньытар, сахалыы тыыны иҥэрэр, куту-сүрү уһугуннарар айар үлэтигэр өссө да ситиһиилэри баҕаран, ытыс тыаһа өргө диэри уҕараабата.