Хаартыска: тыйаатыр сайтыттан
Үҥкүү национальнай тыйаатырыгар СӨ судаарыстыбаннай сүбэһитэ Андрей Борисов, СӨ култуураҕа уонна духуобунай сайдыыга миниистирэ Афанасий Ноев, министиэристибэ ускуустубаҕа салаатын начаалынньыга Саргылана Борисова оробуочай сырыылара буолла.
Ыалдьыттарга тыйаатыр иһигэр эскурсия оҥордулар, онтон балет саалатыгар артыыстары уонна үлэһиттэри кытары көрүстүлэр.
Тыйаатыр уус-уран салайааччыта Светлана Прокопьевна Бессонова кэлэктиип аатыттан Афанасий Ивановиһы култуура миниистиринэн анаммытынан эҕэрдэлээтэ уонна тыйаатыр айар үлэтин сырдатта.
Андрей Саввич 2024 сылга «Азия оҕолоро» успуорт аан дойдутааҕы оонньуулара ыытыллалларын, онно култуура бырагырааматын салайааччытынан бигэргэтиллибитин туһунан иһитиннэрдэ. Кини Саҥа дьыл кэнниттэн оҕо успуордун киэҥ хабааннаах бырааһынньыгын аһыллыытын уонна сабыллыытын сценарийыгар бэлэмнэниини саҕалыаҕа.
Афанасий Иванович кэлэктиип маннык көрсүһүүнү тэрийбитигэр махтанна, саха норуотун үгэс буолбут култууратын харыстааһын суолтатын бэлиэтээтэ уонна ситиһиилээх үлэҕэ алҕаата.
Көрсүһүүгэ искусствоведение доктора, тыйаатыр наукаҕа консультана Ангелина Лукина Үҥкүү национальнай тыйаатырын сүрүн аналын -– испэктээктэргэ саха үгэстэри туһаныыны, тыйаатыр айар үлэтигэр омук тыынын илдьэ сылдьыыны бэлиэтээтэ. Кини тыйаатыр үһүс кэнсиэпсийэтин (2023-2033 сс.) оҥорбута. Ангелина Григорьевна этиитин түмүктүүрүгэр: «Үҥкүү национальнай тыйаатыра айар-тутар уонна сайдар улахан кыахтаах».
Тыйаатыр кылаабынай дирижера Николай Петров тыйаатыр уонна национальнай үнүстүрүмүөннэр оркестрдарын үлэлэрин туһунан кэпсээтэ. Билигин тыйаатыр өрөспүүбүлүкэҕэ саамай бастыҥ састааптааҕын уонна оркестрдааҕын бэлиэтээтэ. Оркестр 30 сыл үлэлээбитин тухары баай репертуарданна, 1000 тахса партитуралаах уонна 40-тан тахса ааптардар туруорбут испэктээктэрдээх. Оркестр хас биирдии артыыһа үгүс өрүттээх талааннаах, хас да үнүстүрүмүөҥҥэ оонньуур дьоҕурдаах. Үрдүк таһымнаах кэлэктиип быйылгы сезоҥҥа Красноярскай куоракка Арассыыйа норуоттарын национальнай оркестрдарын Бүтүн Арассыыйатааҕы бэстибээлигэр кыттан, бастыҥ кэлэктиибинэн билинилиннэ.
Көрсүһүү кэмигэр баар кыһалҕалары быһаарыахтаах боппуруостар бэрилиннилэр: сыана былаһааккалара суоҕа, айар састаапка– балет артыыстарыгар биэнсийэни болдьоҕун иннинэ оҥоруу, командировкалар ороскуоттара муҥутаан кыралара, испэктээктэри, кэнсиэртэри туруорарга, костүүмнэри тигэргэ үбү-харчыны көрүү, наҕараадалары анааһын уо.д.а. Онтон да атын сытыытык турар боппуруостары Афанасий Ноевка суругунан бэлэмнээтилэр.
Кэлэктиип Андрей Борисовка уонна Афанасий Ноевка Үҥкүү национальнай тыйаатырыгар оробуочай сырыыларын иһин махтанна.
Вера ЧЕРНОГРАДСКАЯ
Үөрэх үгүс кыһаларыгар оҕолор икки ардыларыгар араас сыһыан баар буолар. Доҕордоһуу, кэпсэтии, тэрээһиннэргэ кыттыы, ону…
Аныгы үйэҕэ күннээҕи олохпутугар туох буортулааҕын, киһи этигэр-сиинигэр хайдах дьайарын биллэхпитинэ, быһаарыстахпытына эрэ, бэйэбит уонна…
Оҕону көрөргө уоппусканы ийэ эрэ ылыахтаах диэн буолбатах. Сокуон быһыытынан аҕа, эбээ, эһээ, атын аймахтар…
Бүгүн кэпсэтэр киһим, Угледар хайысхатынан сылдьыбыт, Бүлүү улууһуттан төрүттээх «Дуолан» диэн позывнойдаах штурмовик Борис Иванов…
Дьокуускайга Бүлүүттэн 16 саастаах оҕону санрейсинэн аҕаллылар. Кини балаҕан ыйын 11 күнүгэр суол саахалыгар эчэйбит…
Горнай улууһун дьаһалтатын исписэлиистэрэ Горнайдааҕы экологическай кэтэбил иниспиэксийэтин кытары бииргэ Бүтүн Арассыыйатааҕы «Өйдөбүл саада» экологическай…