Үҥкүү тыйаатырын дириэктэрэ чугас дьонун кытта суорума суолламмыт саахалын дьыалата суукка барда

Дьокуускайга буолбут үс киһи өлүүлээх суол саахалын холуобунай дьыалата суукка ыытылынна. Toyota Land Cruiser 200 массыына суоппарын буруйдууллар диэн СӨ Борокуратуурата иһитиннэрэр.

«Дьокуускай борокуратуурата киин куорат олохтооҕун РФ ХК 264 ыст. 5 ч.  (нарушение лицом, управляющим автомобилем, правил дорожного движения, повлекшее по неосторожности смерть двух лиц или более лиц) буруйдуур түмүгүн бигэргэттэ», — диэн иһитиннэриигэ суруллар.

Санатан суруйдахха, кулун тутар 5 күнүгэр Дьокуускай киинигэр суол саахала буолбута. Ленин проспегар  Toyota Land Cruiser 200 уонна Toyota Succeed массыыналар харсыспыттара.  Toyota Succeed массыынанан Үҥкүү тыйаатырын дириэктэрэ чугас дьонун кытта айаннаан испиттэрэ. Ылбыт эчэйиилэриттэн балыыһаҕа сытан, суукка иһигэр үһүөн суорума суолламмыттара.