Үп-харчы гороскоба. Бу нэдиэлэҕэ үп-харчы өттүгэр сулустар тугу сүбэлииллэрий?

Күн Скорпион бэлиэтигэр киирэн, кистэлэҥи арыйар, дириҥник толкуйдуур кэм саҕаланар. Онон бу нэдиэлэҕэ үбү-харчыны ыскайдыыр табыллыбат. Төттөрүтүн, уһун кыһыҥҥа бэлэмнэнэр курдук, харчыгын ааҕар, былаанныыр, уурунар ордук.

Хой 

Хойдор, эһиги айылҕаҕытынан түргэн-тарҕан быһаарыныыны ылынаргытын сөбүлүүгүт. Ол эрээри бу нэдиэлэҕэ ыксаамаҥ. Улахан атыыны оҥорортoн туттунуҥ. Нэдиэлэ ортотугар эргэ иэскитин төлүүр эбэтэр кимтэн эрэ иэстээххитин төнүннэрэр кыах үөскүөҕэ. Ким эмэ «түргэнник байар» ньыманы эттэҕинэ, итэҕэйимэҥ – албыҥҥа киириэххитин сөп. Энергияҕытын үбү-харчыны былаанныырга туһаныҥ.

Оҕус

Оҕустар, эһиэхэ бу нэдиэлэ мунньуллубут үпкүтүн-харчыгытын бэрээдэктииргэ табыгастаах кэм. Баан уурунууларыгар бырыһыаннарын көрүҥ, баҕар ордук барыстаах усулуобуйа көстүөҕэ. Дьиэ кэргэҥҥитигэр туһалаах, ол эрээри наадата суох маллары атыылаһымаҥ. Күндү малтан-салтан аккаастаныҥ. Нэдиэлэ бүтүүтэ үлэҕитигэр үпкэ-харчыга сыһыаннаах үчүгэй сонун күүтэр.

Игирэлэр 

Игирэлэр, эһиги кэпсэтии нөҥүө ситиһиигэ кэлиэххит. Бу нэдиэлэҕэ үпкэ сыһыаннаах ханнык баҕарар докумуону болҕомтолоохтук ааҕыҥ. Тылынан этиллибит эрэннэриигэ итэҕэйимэҥ, барытын кумааҕыга суруттарыҥ. Доҕотторгутугар-атастаргытыгар иэһи биэрэртэн туттунуҥ, төннөрөллөрө уустук буолуон сөп. Саҥа үлэ эбэтэр эбии үп-харчы киллэринэр туһунан санаа киирдэҕинэ, ырытан көрөргө сөптөөх кэм.

Араак

Араактар, эһиги дьиэҕитигэр-уоккутугар, чугас дьоҥҥутугар улахан болҕомтону уурар кэмҥит. Дьиэ кэргэн бүддьүөтүн тэрийиигэ бары күүскүтүн ууруҥ. Улахан өрөмүөнү эбэтэр дьиэҕэ аналлаах бөдөҥ атыыны былаанныаххытын сөп, ол эрээри харчыгытын бу нэдиэлэҕэ туттумаҥ. Уурунуу эһиэхэ билигин улахан туһаны аҕалыа. Ийэҕит эбэтэр эбэҕит сүбэтин истиҥ, кинилэр үпкэ-харчыга сыһыаннаах муударай тыллара көмөлөһүөҕэ.

Хахай

Хахайдар, эһиги хаһан баҕарар килбэйэ, тулалыыр дьоҥҥутун сөхтөрө сылдьаргытын сөбүлүүгүт. Ол эрээри бу нэдиэлэҕэ эбии ороскуотурар наадата суох. Эһиги күүскүт билигин – сатаан былааннааһыҥҥа, инникини өтө көрүүгэ сытар. Баар харчыгытын хаттаан көрүҥ, баҕар туох эрэ уларытыыны киллэрэр наада буолуо. Үлэҕитигэр салайааччыгыт иннигэр саҥа бырайыагы көмүскээтэххитинэ, инникитин үп-харчы өттүнэн ситиһии күүтэр.

Кыыс

Кыыстар, бу эһиги нэдиэлэҕит! Сулустар эһигини үп-харчыны бэрээдэктииргэ толору өйүүллэр. Кыра да ороскуоту ааҕан, кыһыҥҥы бүддьүөккүтүн оҥостуҥ. Эргэ чиэктэри, докумуоннары көрүҥ, баҕар ханна эрэ сыыһа-халты төлөммүт эбэтэр баан сыыһатын булуоххутун сөп. Бу нэдиэлэҕэ саҕаламмыт харчыныы уурунуу үгэһэ кэлэр сылга диэри эһиэхэ улахан барыһы аҕалыа.

Ыйааһын 

Ыйааһыннар, эһиэхэ бииргэ үлэлээһин инники күөҥҥэ тахсар. Үп-харчы боппуруостарын (ипотека, кирэдьиит, улахан атыы) кэргэҥҥитин эбэтэр биисинэс-партнергытын кытта ырытыҥ. Биир санааҕа кэллэххитинэ, ханнык баҕарар ыарахаттары туоруоххут. Соҕотохтуу быһаарыныыны ылынартан сэрэниҥ. Нэдиэлэ бүтүүтэ юридическай боппуруостары быһаарарга табыгастаах буолуо.

Скорпион 

Скорпионнар, Күн эһиги бэлиэҕитигэр киирдэ, онон эһиги күүстээххит, интуицияҕыт сытыырхайбыт. Үп-харчы боппуруоһугар ис сүрэххитин истэ үөрэниҥ. Кистэлэҥ дохуот, нэһилиэстибэ эбэтэр страховка харчыта киирэр кыахтаах. Эргэ, умнуллубут былааннары хаттаан көрөн, саҥалыы үлэлэтэн барыс киллэриэххитин сөп. Бэйэҕит үпкүтүн-харчыгытын атын дьоҥҥо кэпсээмэҥ, харчы «чуумпуну» сөбүлүүр.

Охчут 

Охчуттар, эһиги айылҕаҕытынан оптимист буоларгыт үпкэ-харчыга мэһэйдиэн сөп. Бу нэдиэлэҕэ сүүйтэриилээх лотереяларга, биллибэт-көстүбэт инвестицияларга кыттыһымаҥ. Кылгас кэмнээх барыс оннугар, уһун болдьохтоох сыалы туруорунуҥ. Холобур, саас сынньалаҥҥа барар харчыгытын мунньан баран, ол санааҕытыттан күүс-уох ылыҥ. Айаҥҥа сыһыаннаах ороскуоттар тахсыахтарын сөп, ол эрээри барытын эрдэттэн былааннаатахха, хоромньута суох буолуо.

Чубуку 

Чубукулар, эһиги үлэҕит, карьераҕыт өрө тахсар кэмэ. Бу нэдиэлэҕэ сыралаах үлэҕит түмүгүн салайааччыларгыт бэлиэтии көрүөхтэрэ, баҕар бириэмийэ эбэтэр хамнас эбилиитэ күүтүөн сөп. Ол эрээри, киирбит харчыны тута ыскайдаамаҥ. Эһиги  тулуургут – сүрүн күүскүт. Иэстэргитин сабар эбэтэр ипотекаҕытын болдьоҕун иннинэ төлүүр туһунан толкуйдааҥ.

Күрүлгэн 

Күрүлгэннэр, саҥа технологиялар уонна уопсастыбаннай үлэ эһиэхэ үп-харчы киллэриэн сөп. Онлайн-үөрэххэ кыттыһан, саҥа идэни баһылаан, эбии дохуоттаныаххытын сөп. Бөлөҕүнэн үлэлиир бырайыактар барыстаах буолуохтара. Ол эрээри, интэриниэт  ситимигэр баар үп-харчы пирамидаларыттан, «чэпчэки харчыттан» сэрэниҥ. Эһиги креативнай санааҕыт үп-харчы киллэрэр кыахтаах, сүрүнэ – ону олоххо киллэрэртэн толлумаҥ.

Балыктар 

Балыктар, эһиги уйан дууһалаах, итэҕэйимтиэ буоларгыт бу нэдиэлэҕэ үпкэ-харчыга кутталлаах буолуон сөп. Ханнык баҕарар үп-харчы докумуонугар илии баттыаххыт иннинэ, эрэллээх киһигитинэн (юрист, чугас доҕоргутунан) аахтаран көрүҥ. Аһыныгас санааҕытыгар оҕустаран, албын дьоҥҥо харчыгытын биэримэҥ. Айар үлэнэн дьарыктанар буоллаххытына, бу нэдиэлэҕэ саҥа сакаас киирэн, үп-харчы өттүнэн туругу тупсарыан сөп.

Бу кыһыҥҥы нэдиэлэ барыбытыттан болҕомтону, былааннаах буолууну ирдиир. Сулустар сүбэлэрин истэн, үпкүтүн-харчыгытын хонтуруолга тутуҥ, оччоҕо кэлэр ыйдарга үп-харчы өттүнэн туруккут бигэ буолуоҕа.