Үп-харчы гороскоба. Бу нэдиэлэҕэ үп-харчы өттүгэр сулустар тугу сүбэлииллэрий?

Бу нэдиэлэҕэ эргэ сыл түмүктэнэр, саҥа сыл саҕаланар. Сулустар Чубуку бэлиэтигэр күүскэ дьайаллар, онон бу кэм үпкэ-харчыга сыһыаннаах боппуруостары быһаарарга, былааннары оҥосторго уонна тус бэйэни бөҕөргөтөргө олус табыгастаах. Сулустар сүбэлэринэн, үүммүт нэдиэлэҕэ ааспыт сыл алҕастарын анаарар, иэстэри-күүстэри сабар уонна кэлэр сылга үп-харчы туругун бөҕөргөтөр дьаһаллары ылынар наадалаах.

Хой 

Бу нэдиэлэҕэ күүскүн-уоххун барытын үлэҕэр-хамнаскар туһаай. Саҥа дьыл саҕаланыыта салайааччыгын кытта кэпсэтэн, инники былааннаргын, хамнаһыҥ үрдүүрүн туһунан ыйытар кэм. Ол эрээри, Саҥа дьыл саҕаланыыта атыы-кутуу аймалҕаныгар ылларыма, өрүскэлэһэн, ыгылыйан туран туһата суохха харчыгын ыһыма. Эргэ кыра иэстэргин төлөөн, саҥа сылы ыраас көрсөргө дьулус.

Оҕус 

Эн барыта сөбүгэр-кэмигэр, дьаһаллаах буолууну сөбүлүүгүн, онон нэдиэлэ эйиэхэ анаммыт курдук. 2026 сылга анаан чуолкай бүддьүөтү оҥостон торумнаа. Ханна харчыгын анаан мунньаргын, ханна уган үлүннэрэн ыларын олорон эрэ толкуйдаа. Дьиэ кэргэҥҥин кытта үп-харчы боппуруостарын дьүүллэһэргэ табыгастаах кэм. Бырааһынньыктааҕы ороскуоттары хонтуруоллаа, кыратык кэччэйэр ордук.

Игирэлэр

Эн сытыы өйүҥ саҥа дохуот киллэрэр ньымалары көрдүүргэ көмөлөһүө. Бэйэ дьарыктаах буолууну, биисинэһи арыйыыны, саҥа бырайыактар эбэтэр эбии үөрэх туһунан толкуйдаа. Элбэх сонун кэлиэҕэ, ол иһигэр албын этиилэр да баар буолуохтарын сөп, онон болҕомтолоох буол. Докумуоннары, дуогабардары хаста да сиһилии ааҕан бэрэбиэркэлээ.

Араак 

Дьиэ кэргэн инники бүддьүөтэ – эн сүрүн болҕомтоҕор. Бырааһынньык ороскуоттарын кэнниттэн, дьиэ кэргэниҥ үбүн-харчытын сааһылыырга үчүгэй кэм. Улахан атыыны былаанныыр буоллаххына, билигин ыксаама, үчүгэйдик ырыҥалаан көр. Чугас дьоҥҥор харчынан көмөлөһөр буоллаххына, төһөнү  биэрэргин эрдэтинэ быһаар.

Хахай

Эн бэлэх оҥороргун, дьоҥҥо-сэргэҕэ күндүлүүргүн сөбүлүүгүн. Ол эрээри бу нэдиэлэҕэ ороскуотуҥ дохуоккун аһарыа суохтаах. Кэлэр сылга үп-харчы эбии киллэринэр сыалын-соругун туруорун. Айар дьоҕургун үпкэ-харчыга кубулутар туһунан толкуйдаа. Кимтэн эмэ иэс ылартан туттунарын ордук. Бэйэҕин хааччынар былаан ситиһиилээх буолуо.

Кыыс 

Бу эн кэмиҥ! Ааспыт сыл ороскуоттарын, дохуоттарын ырытан, ырытыы үлэни, суоту-учуоту ыытарга бэртээхэй кэм. Ханна ордук харчы ороскуоттаабыккын көрөн, кэлэр сылга ону хайдах кэмчилиэххэ сөбүн толкуйдаа. Саҥа сылтан саҕалаан харчы мунньунар үтүө үгэһи киллэрин. Уһун болдьохтоох харчы угар ньымалары үөрэт.

Ыйааһын

Партнердарыҥ, доҕотторуҥ үп-харчы боппуруостарыгар көмөлөһүөхтэрэ. Бииргэ үлэлиир дьонуҥ эбэтэр олоҕуҥ аргыһын кытта  үп-харчы былаанын оҥостор наада. Ол эрээри, харчыга сыһыаннаах мөккүөртэн сэрэнэ сырыт. Барытын аһаҕастык кэпсэтэн быһаарсар ордук. Соһуччу этиилэргэ сөбүлэһэргэ ыксаама.

Скорпион 

Эн ис санааҥ инникини өтө көрөр күүһэ күүһүрүө. Ханна харчы угар сөбүн эбэтэр хантан туох эмэ барыс киирэрин сүрэҕиҥ сэрэйиэ. Иэстэри төлүүргэ, кирэдьииттэри сабарга табыгастаах кэм. Саҥа сылга үп-харчы эйгэтигэр улахан уларыйыылары киллэриэххин баҕардаххына, билигин олорон эрэ инники былаанын оҥорор ордук. Кистэлэҥ дохуот киириэн сөп.

Охчут 

Инникигэ харчы үлүннэрэн ыларга биир эмит ньыманы туһанарга табыгастаах кэм. Үөрэххэ, бэйэни сайыннарыыга, айаҥҥа харчы угар буоллаххына, кэлин барыта хайаан да эргиллэн кэлиэ. Бырааһынньык кэнниттэн бүддьүөтүҥ ороскуота намыһах буоларын ситис. «Чэпчэки харчы» эргийэр сиригэр кииримэ, лотереяҕа улаханнык эрэнимэ. Эрэллээхтик үлэттэн хамнастанар эйиэхэ ордук ситиһиини аҕалыа.

Чубуку

Сулустар эйиэхэ бэртээхэй кэми бэлэхтииллэр! Карьераҕар үүнүү, хамнас эбиллиитэ күүтүөн сөп. Саҥа сылтан саҕалаан үп-харчы балаһыанньатын тупсарар бары кыахтар эн илиигэр бааллар. Сүрүнэ – барыларыттан инники буолары ситис, дьаныардаах буол. Нэдиэлэ бүтүүтэ улахан атыыны оҥоруоххун сөп, ол эрээри үчүгэйдик толкуйдаа.

Күрүлгэн

Саҥа идиэйэлэр, ураты быһаарыылар эбии үп-харчы киллэриэхтэрин сөп. Онлайн-бырайыактар, IT-технологиялар эйиэхэ барыстаах буолуохтара. Доҕотторгуттан интэриэһинэй үп-харчы этиитэ киириэн сөп. Ол эрээри, барытын бэрэбиэркэлээ. Соһуччу ороскуоттар тахсыахтарын сөп, онон кыра саппаастаах сылдьар ордук.

Балыктар 

Ис санааҕын иһиллээ, ол эйигин албынтан, ночооттон харыстыа. Айар дьоҕургун үпкэ-харчыга кубулутар туһунан толкуйдаа, сөбүлүүр дьарыгыҥ эбии дохуот киллэриэн сөп. Кими эмит аһыммыта буолан, улахан харчыны сүтэрэр куттал баар. Аһымал аахсыйаҕа кыттар буоллаххына, ол эйиэхэ хайаатар да үтүөнэн эргиллиэ.