Хаартыска: ИДьМ телеграм-ханаалыттан.
Дьокуускай куорат 70 саастаах олохтооҕо пайщиктаахтар харчыларын уоруутунан тэриллибит холуобунай дьыала барыллаан силиэстийэтэ түмүктэннэ.
Силиэстийэ көрүүтүнэн, 2015 сыл ыам ыйыттан 2024 сыл от ыйыгар диэри аһымал аахсыйанан (благотворительнай) уонна инвестициянан, ону тэҥэ, чилиэн быһыытынан дьону киллэрэн, харчы хомуйан, ууруммут харчыларыттан дивиденд ыларга эрэннэрэн, кирэдьиити төлүүр эбэһээтилистибэни сабарга көмөлөһүүнэн дьарыктанабын диэн ааттаан кэпэрэтиип тэрийэн үлэлэппит.
Дьахтар сокуонунан көҥүллэммэт үлэтин биэс хайысханан ыыппыт – юридическай, үп-харчы, мэдиссиинэ өҥөтө, көтөр этиттэн бородууксуйаны кууһунан атыылааһын уонна тыа хаһаайыстыбатын култууратын үүннэрии. Ол эрээри, буруйу оҥорооччу ылыммыт эбэһээтэлистибэтин толорор санаата суох эбит, акционердар төлөбүрдэрин бэйэтигэр иҥэринэн туһаммыт.
Түөкүннээччи саҥа кыттааччылары киллэрэр инниттэн аҕытаассыйалыыр үлэни ыыппыт: чугас улуустарга сылдьыбыт, нэһилиэнньэни кытта көрсүһүүлэри тэрийбит, бириистээх лотереялары, оонньуулары ыыппыт, ону тэҥэ, олохтоохтор уопсастыбаҕа чугас дьоннорун киллэрэллэригэр ыҥырбыт.
Көхтөөх уопсастыбаннай үлэни ыытабын диэн ааттаан буруйданааччы бастайааннай сылдьааччылары (клиент) кырааматаларынан, бэлэхтэринэн бэлиэтээбит, дивиденд төлөнүүтүгэр ордук быраабы биэрэр диэн “добрай каарталары” түҥэтэлээбит. Ону таһынан, Дьокуускай куорат 203-с түөлбэтигэр тутулла турар дьиэҕэ кыбартыыра биэрэргэ сымыйа сэртипикээттэри биэртэлээбит. Бу иһин кини дьонтон чилиэн усунуоһун быһыытынан биир кэмнээх, улахан суумалаах харчыны көрдүүр эбит.
Дьылҕа быһаарыытынан 2024 сыллаахха буруйу оҥорооччу төлөпүөн түөкүттэригэр киирэн биэрэн дьонтон ылбыт улахан сууматыттан маппыт. Ол эрээри, бу түгэни кини бэйэтин туһугар туһаммыт — бу үбү Киин баан “кутала суох счетугар” ыыттым диэн сымыйа ыспыраапкалары оҥортообут. Харчыгыт эрэллээхтик харалла сытар диэн эрэннэрээри, бу сымыйа докумуонун пайщиктаахтарга көрдөрбүт.
Силиэстийэ быһаарбытынан, буруйданааччы дьайыытыттан Саха сирин араас улуустарыгар олорор 33 киһи эмсэҕэлээбит. Албыннатыы уопсай суумата 17 мөл. солк. тэҥнэспит.
РФ Холуобунай кодексын 159 ыст. 4 ч. буруйу оҥорууга көбүтүллүбүт холуобунай дьыаланы, буруйдуур түмүгү кытта суут көрүүтүгэр ыыппыттар. Бу туһунан СӨ ИДьМ пресс-сулууспата иһитиннэрэр.
“МАХ мессенджергэ контены тохтуу түһэн баран таһаарары былаанныыр кыахтаннылар, оттон сурутааччылар – иһитиннэриилэрин эрдэттэн ыйбыт…
Олунньу 2 күнүттэн Саха сиригэр бырабыыталыстыба отчуота үгэс быһыытынан, сирэй көрсөн ыытыллыаҕа. Көһө сылдьар мунньахтарга …
Саха сирин олохтоохторугар хомунаалынай өҥө счетчиктарын көрдөрүүлэрин МАХ-ка чат-бот нөҥүө биэрэр кыах үөскээтэ. Бу сыыппара…
“Энэргиэтикэ” хайысхатыгар РФ Судаарыстыбаннай сэбиэтин хамыыһыйатын бастакы мунньаҕар ааспыт сыл түмүгүн таһаардылар уонна 2026 сыллааҕы…
Аҕа дойду Улуу сэриитигэр Ленинград куорат 872 күннээх өстөөх ытарчатын тулуйбута. Бу ытык сир көмүскэлигэр…
Ааспыт сууккаҕа Саха сиригэр буруйу оҥоруу икки түбэлтэтэ тахсыбыт. Манан процессуальнай бэрэбиэркэни ыытыыны уонна холуобунай…