Ырааҕы ытыыга II  Бүтүн Арассыыйатааҕы турнир түмүктүүр күнэ саҕаланна

Дьокуускай куоракка Сэбиэскэй Сойуус Дьоруойа Федор Охлопков кэриэһигэр анаммыт ырааҕы ытыыга II  Бүтүн Арассыыйатааҕы турнир бүгүн түмүктүүр иккис күнэ.

Быйыл күһүҥҥү турнирга барыта 140 ытааччы кытынна. Алтынньы 11 күнүгэр турнирга сүүмэрдиир ытыыга үгүстэрэ сыыйыллан, бүгүн 30-ча эрэ киһи бастыыр иһин киирсэ сылдьар. Бэҕэһээ күүстээх тыаллаах, тымныы күн буолан уонна сэрэбиэйдэрэ табыллыбакка, кыттааччылар үгүстэрэ даҕаны сааскы күрэхтэһиитээҕэр көрдөрүүлэрэ мөлтөөбүтүн эттилэр.

Икки күннээх турнирга квалификация, «День» уонна «Ночь» диэн түһүмэхтэринэн күрэхтэһэллэр. Бастакы тэрээһин олунньуга -45 кыраадыска тиийэ тымныыга буолбута. Онно соҕурууттан кэлбит үгүс киһи тымныыга үөрэммэтэх буолан, тоҥуу-хатыы элбэх этэ. Бу да сырыыга бастакы күн инчэҕэй хаардаах ардах түспүтэ, иккис күн күүстээх тыаллаах этэ, оттон бүгүн чаҕылхан күн үүннэ. Ол эрээри полигоҥҥа мэлдьи тыаллаах буолар, онон ким тыалы сөпкө учуоттуур, сатабыллаах – ол таба ытар.