Хаартыска: ааптар тиксэриитэ
Анаабыр улууһун Үрүҥ Хайа сэлиэнньэтигэр киэҥ, сырдык дьиэлээх Наталья Афанасьевна уонна Спиридон Николаевич Осиповтар олороллор.
Быйыл 71 сааһын туолар Спиридон Николаевич Бүлүү улууһун Чинэкэ нэһилиэгэр күн сирин көрбүтэ. 1973 сыллаахха Чинэкэҕэ орто оскуоланы бүтэрэн баран, Читаҕа аармыйаҕа икки сыл сулууспалаабыта. Аармыйа кэнниттэн Анаабырга идэтинэн киинэ мэхээнньигинэн анаммыта. Үрүҥ Хайаҕа кэлэн, киинэ мэхээнньигинэн үлэлээбитэ, ыстаадаларга сылдьан киинэ көрдөрөрө, лиэксийэ ааҕара, сонуннары кэпсиирэ, хаһыат, сурунаал илдьэрэ.
Онтон «Якуталмаз» тэрилтэҕэ райпоҕа көспүтэ. Өр сылларга үтүө суобастаахтык үлэлээбит дьиэ-уот, коммунальнай хаһаайыстыбатыгар билигин да үлэлии сылдьар.
Олоҕун аргыһа Наталья Афанасьевналыын олорбуттара 47 сыла буолла. Наталья 1960 с. Үрүҥ Хайаҕа күн сирин көрөн, оскуоланы бүтэрэн, дойдутуттан ханна да ырааппакка, уһуйаан иитээччитин көмөлөһөөччүтүнэн үлэлээн, билигин биэнсийэҕэ олорор. Осиповтар ыал буолбут оҕолоро улаатан, кийиит, күтүөт элбэх, 16 сиэннээхтэр, алта хос сиэннээхтэр. Эбээ киһи быһыытынан, оҕону көрүү, таҥастарын тигии, астарын астааһын түбүгэ бүппэт. Ону таһынан тирии, тыс имитэн, хопоо, ынтака, этэрбэс, үтүлүк уо.д.а. тигэр, абырахтыыр. Түргэн-тарҕан туттуулаах Натаа ол быыһыгар ыраах соҕус уһуйааҥҥа түөрт саастаах сиэнин салаасканан соһон, эбэтэр Спиридон Буранынан илдьэллэр.
Наталья оҕуруоттан оҥоһуктарын көрөммүн, кыһын күн көрбөт, уһун кыһыннаах кэмҥэ олохторун «кустук өҥүнэн” киэргэтэн, сырдатан олороллор эбит дии санаатым. Наталья сэмэйэ бэрт буолан, быыстапка да тэрийбэт эбит. Дьиҥэр, тикпит, оһуордаабыт үлэлэринэн дьоҥҥо-сэргэҕэ биллэн, «норуот маастара” да буолуон сөптөөх эбит.
Ити курдук, былыр-былыргыттан долган омук уолаттара кыыл табаны кытта тэҥҥэ сырсар булчуттар, кыргыттара иистэнньэҥнэр, асчыттар. Натальялаах Спиридон алта оҕолоохторуттан төрдүс оҕолоро, элбэх оҕо аҕата Даниил 2023 сылтан Запорожье диэки байыаннай дьайыыга сылдьар.
Галина БОРИСОВА-ТОЛБООНО
Бу күннэргэ «Саха волонтердара» хамсааһын колл-киинигэр Екатеринбург куораттан госпиталга сытар байыастан сайаапка киирбит. Саха сириттэн…
Бүгүн Горнай улууһун Аһыма сэлиэнньэтигэр оту тиэммит түөрт массыына кэллэ. Ол курдук, Хаҥалас улууһун Уулаах…
Кэнники сылларга киин куоракка сылаас тохтобуллары оҥороннор, олохтоохтор кыһыҥҥы тоһуттар тымныыга оптуобус кэтэһэллэригэр абыраннылар. Дьокуускай…
Олунньу 3 күнүн киэһэтигэр ИДьМ 1-кы нүөмэрдээх полиция салаатын дьуһуурунай чааһыгар, Звезднай түөлбэ биир дьиэтигэр…
Ылдьаа Скрябин күрэхтэһии түһүлгэлэригэр кэпсиир-сырдатар куолаһын дьон барыта биһириир, ылынар. 1990-с сыллардаахха Чурапчыга Иван Ильич…
Бүгүҥҥүттэн Хаҥалас улууһугар ситэриилээх былаас отчуота Иһит нэһилиэгиттэн саҕаланна. Оробуочай бөлөҕү бырабыыталыстыба бэрэссэдээтэлин солбуйааччы Анатолий…