Ыраах сытар Сиэгэн Күөлгэ түргэн интэриниэт холбонуоҕа

“Арктика синергията” телекоммуникационнай инфраструктураны сайыннарыы бөдөҥ бырайыагын көмөтүнэн быйыл Кэбээйи улууһун ыраах сытар Сиэгэн Күөл сэлиэнньэтигэр оптоволоконнай сибээс линията тардыллыаҕа, диэн ситэриилээх былаас түмүк отчуотун кэмигэр этилиннэ.

Өрөспүүбүлүкэ бырабыыталыстыбатын бэрэссэдээтэлин солбуйааччы Сергей Местников улууска бырабыыталыстыба отчуотун түмүгүн оҥордо.

«Сангаарга түмүктүүр отчуот үчүгэйдик ааста. Олохтоох нэһилиэнньэ 2028 сылга 100 сыллаах үбүлүөйүн бэлиэтиир Сангаар бөһүөлэгин сайдыытыгар болҕомтолорун уурбуттарын иһин Ил Дархан Айсен Николаевка уонна бырабыыталыстыбаҕа махтанна. Аныгы хааччыллыылаах балыыһа аһыллан дьон үөрэн олорор. Билигин бөһүөлэк уонна улуус олохтоохторо атын сиргэ айаннаабакка квалификациялаах мэдиссиинискэй көмөнү миэстэтигэр ылар кыахтаммыттар», — диэн бэрэссэдээтэли солбуйааччы бэлиэтээтэ.

Поликлиника дойду бэрэсидьиэнэ Владимир Путин көҕүлээһининэн ыытыллыбыт «Доруобуйа харыстабыла» национальнай бырайыак чэрчитинэн тутуллубута. Бу национальнай бырайыагы билигин «Уһун уонна көхтөөх олох» диэн саҥа национальнай бырайыак салгыыр.

Бөһүөлэккэ автоматизированнай гибриднэй энергетическэй комплекс (АГЭК) тутулла турар. Бүттэҕинэ, энергокомплекс Сангаар олохтоохторун, ону тэҥэ социальнай суолталаах эбийиэктэри эрэллээх уотунан хааччыйыаҕа.

Ону таһынан бөһүөлэк чугаһыгар баар сабыллыбыт таас чох шахтатыгар умайа сытар эндогеннай баһаары умуруорууга бырайыактыыр-сметнай докумуоннары оҥоруу эмиэ сотору кэминэн саҕаланыаҕа.

Бэрэссэдээтэли солбуйааччы ыраах сытар Батамай, Сиэгэн Күөл, Сэбээн Күөл нэһилиэнньэлээх пууннарыгар нэһилиэнньэ үгэс буолбут олоҕу тутуһарын бэлиэтээтэ.

«Урут Сэбээн-Күөлгэ таба иитиитинэн «Сэбээн» МУП эрэ дьарыктанар эбит буоллаҕына, билигин общиналар тэриллэн үлэлии-хамсыы сылдьаллара үөрдэр, атын улуустартан табалары атыыласпыттар. Өрөспүүбүлүкэҕэ эбээн тылынан үөрэтэр соҕотох оскуолаҕа сырыттым. Манна төрөөбүт тылынан туох баар биллэриилэрэ, араспысаанньалара, күннээҕи дьаһаллара, кылаастар ааттара оҥоһуллубуттар, оҕолор сынньалаҥ кэмигэр төрөөбүт тылларынан кэпсэтэллэр», — диэн үллэһиннэ.

Сиэгэн Күөлгэ байыаннай дьайыы кыттыылааҕа туризм эйгэтигэр бэйэтин дьыалатын арыйарга быһаарыммытын эппит уонна өйөбүл миэрэлэрин туһунан ыйыталаспыт. Оробуочай бөлөх чилиэннэрэ сиһилии быһааран биэрбиттэр.

Батамайга быйыл “Мин Сахам сирэ XXI үйэҕэ” үтүө дьыала хамсааһын бырагырааматынан култуурунай-спортивнай комплекс тутуута бүтүөхтээх.

“Ааспыт сылларга Батамай олохтоохторо төрөөбүт тылларынан үөрэтэр чааһы элбэтэри туруорсаллара. Билигин ити боппуруос быһаарылынна. Дьон-сэргэ астынна”, — диэн бэлиэтээтэ Сергей Местников.

Кини этэринэн, улуус олохтоохторо Олоҥхо Ыһыаҕын олус кэтэһэллэр, бэлэмнэнэллэр. Сэбээн Күөл оскуолатын оҕолоро “Ньургун Боотур” олоҥхоттон быһа тардан эбээннии толороору сылдьаллар, диэн иһитиннэрэр Ил Дархан, бырабыыталыстыба пресс-сулууспата.