Ырар эмтэри атыылаан, сууттаммыт

СӨ Үрдүкү Суутун пресс-сулууспата иһитиннэрбитинэн, 45 саастаах дьахтар ырар эмтэри сокуоннайа суохтук атыылаан, буруйдааҕа дакаастанна.

Бу дьахтар интэриниэтинэн ырарга аналлаах, күүстээх дьайыылаах эмтэри атыылаһан ылан баран, биир дойдулаахтарыгар сокуоннайа суохтук атыылыыр эбит. Бу эмтэри Арассыыйаҕа көҥүллүк атыылыыр хааччахтаах. Оттон кини табылыаккалары Орто Азия биир өрөспүүбүлүкэтиттэн сакаастаан ылар эбит. Доруобуйаҕа хайдах дьайара биллибэт, туох да сэртипикээтэ суох. Силиэстийэ кэмигэр атыыһыты булбатылар.

Дьахтар ИДьМ бэтэрээнэ эбит. Суут кэмигэр буруйун билиммэтэх, ырар эмтэри бэйэбэр анаан ылбытым диир эбит. Ол эрээри, атыылаабыт түгэннэрэ дакаастаммыттар.

Суут кинини 6 сылга усулуобунай болдьоххо көҥүлэ быһылларыгар (3 сыл кэтээн көрөр болдьохтоох) уурда уонна 100 тыһыынча солкуобайга ыстарааптаата. Адвоката суут бу быһаарыытын ааһына сатаата да, Саха сирин Үрдүкү Суута бириигэбэри оннунан хаалларда.