Үрдүк хаан баттааһынын утары охсуһуу нэдиэлэтэ ыытыллар

Ыам ыйын 17 күнүгэр Артериальнай гипертензия аан дойдутааҕы күнэ бэлиэтэнэр. Онтон сиэттэрэн, Дьокуускайга ыам ыйын 12 күнүттэн Артериальнай гипертензияны утары охсуһуу нэдиэлэтэ буола турар.

Артериальнай гипертензия диэн — хаан баттааһына 140/90 мм рт.ст. үрдүк буоллаҕына, бэлиэтэнэр. Бу ыарыыны эмтээбэтэххэ, сүрэх ишемическэй ыарыытыгар, инсулька, инфарка, бүөр ыарыыларыгар тиэрдиэн сөп. Үрдүк хаан баттааһына биллибэккэ сылдьан, сүрэҕи, хараҕы, бүөрү, тымырдары, мэйиини алдьата, кэбирэтэ сылдьар.

Аан дойдутааҕы доруобуйа харыстабылын тэрилтэтин дааннайдарынан, 1990 сылтан 2019 сылга диэри гипертензиянан ыалдьар уонна бастайааннай  эмп иһэр дьон ахсаана 650 мөлүйүөнтэн 1,3 миллиардка диэри эбиллибит. Билигин хас үһүс киһиэхэ хаанын баттааһына үрдүк. Сорохтор ону билбэккэ да сылдьаллар, тоҕо диэтэр, үксүгэр туох да сибикитэ суох буолар.

Ол эрээри, хаан баттааһынын үрдээһинэ сүрэх-тымыр ыарыыларыгар тиэрдэр, онтон өлүү ахсаана искэнтэн, оһолтон өлүү кэнниттэн, үһүс миэстэҕэ турар.

Бу нэдиэлэ сыала-соруга — дьон доруобуйаларын көрүнэр, дабылыанньаларын хонтуруолланар, бырааска эмтэнэр буолалларын ситиһии.

Аахсыйа чэрчитинэн, атыы-эргиэн дьиэлэригэр хаан баттааһынын босхо кээмэйдиэхтэрэ. Мэдиссиинэ тэрилтэлэригэр Аһаҕас аан күннэрэ ыытыллыахтара. Сырдатар, сэрэтэр үлэ ыытыллар.