Үрдүк хамнастаах учууталлардаах эрэгийиэннэр ортолоругар Саха сирэ эмиэ киирбит

РФ Үөрэҕин министиэристибэтэ Үөрэхтээһин Арассыыйатааҕы биир идэлээх сойуустарын кытта кэтээн көрүүлэрин дааннайыгар олоҕуран, ТАСС 2024 сыл I кыбартаалыгар учуутал номинальнай хамнаһа төһө буолбутун ырыҥалаан көрдө.

Дьэ 2024 сыл I кыбартаалын дааннайын быһыытынан учуутал номинальнай хамнаһа  100 тыһ. солк. аһарар — Москваҕа (133,2 тыһ. солк.), Ямало-Ненецкэй уокурукка (137,7 тыһ. солк.), Магадан (136,8 тыһ. солк.) уонна Сахалин (127,2 тыһ. солк.) уобаластарыгар уонна Чукоткатааҕы автономнай уокурукка (149,1 тыһ. солк.).

РФ алта эрэгийиэнигэр учуутал хамнаһа 85 тыһ. солк. аһарар. Бу Ненецкэй автономнай уокурукка (96,8 тыһ. солк.), Мурманскай уобаласка (85,3 тыһ. солк.), Санкт-Петербурга (85,7 тыһ. солк.), Ханты-Мансийскай автономнай уокурукка (91,1 тыһ. солк.), Саха сиригэр (86,1 тыһ. солк.) уонна Камчатка кыраайыгар (92 тыһ. солк.).

Онно холоотоххо Соҕурууҥҥу уонна Хотугу-Кавказтааҕы федеральнай уокуруктарга учуутал номинальнай хамнаһа 35 тыһ. солк. тахсыбат.

Кэтээн көрүүгэ биир федеральнай уокурук иһигэр араастаһыы тахсар аҕай эбит. Холобур, Ненецкэй АУо уонна Санкт-Петербурга учуутал номинальнай хамнаһа 85 тыһ. солк. тахса буоллаҕына, кэккэлэһэ Псков уобалаһыгар 38,9 тыһ. солк. тэҥнэһэр. Оттон Киин федеральнай уокурукка Москва учууталын уонна Ивановскай уобалас учууталын хамнастарын араастаһыыта 97,4 тыһ. солк. тэҥнэһэр.

РФ Бэрэсидьиэнэ Владимир Путин Федеральнай мунньахха анал этиитин түмүгүнэн бүддьүөт үлэһиттэрин хамнаһыгар төлөбүр саҥа тиһигин киллэрэри сорудахтаабыта. 2025 сылга ону хас да эрэгийиэҥҥэ бэрэбиэркэлиэхтээхтэр.