Үрдүк наҕараадатынан эҕэрдэлиибин!

Бүлүү улууһун ыраах Хаҕын орто оскуолатын 10 үөрэнээччитэ Москва, Санкт-Петербург, Казань куораттарыгар “Нуучча филологията”, “Тыллары тэҥнээн көрүү” дьиссиппилиинэлэригэр Бүтүн Арассыыйатааҕы билим-быраактыка кэмпиринэсийэлэригэр Саха сирин аатын уон төгүл көмүскээбиттэрэ.

Хаҕын нэһилиэгэ Бүлүү улууһун саамай хоту сытар нэһилиэнньэлээх пууна буолар.

Бу уһук нэһилиэккэ 1985 сыллаахха, Магаданнааҕы педагогическай университеты ситиһиилээхтик бүтэрбит эдэр исписэлиис Марианна Томская, Норуот үөрэҕириитин Бүлүү оройуонунааҕы салаатын тыырыытынан, нуучча тылын, литэрэтиирэтин учууталынан үлэлии тиийбитэ. Оччолорго начаалынньыгынан биһиги биир дойдулаахпыт, өрөспүүбүлүкэҕэ үөрэҕи тэрийиигэ киэҥник биллэр Андреев Афанасий Николаевич олороро. Онтон ыла номнуо 40 сыл аҕатын, Аҕа дойду Улуу сэриитин кыттыылааҕа, РСФСР үөрэҕириитин туйгуна Томскай Федор Семенович педагогическай эстафетатын салҕаан, Марианна Федоровна күн бүгүҥҥэ диэри оскуолаҕа да буолбатар, педагогическай үлэтин салгыыр.

Улуус, өрөспүүбүлүкэ кэмпириэнсийэлэригэр кыайыы уонна “Интеллектуальное возрождение”, “Шаг в будущее” (Москва), “Открой в себе ученого”,  Н.И.Лобачевскай аатынан Бүтүн Арассыыйатааҕы (Поволжскай) билим кэмпириэнсийэтигэр, “Леонардо” айар арыйыы уонна көҕүлээһин Бүтүн Арассыыйатааҕы бэстибээлигэр, “Шаг в будущее” Арассыыйатааҕы эдэр чинчийээччилэр күрэхтэһиилэрэ курдук үрдүк таһымнаах тэрээһиннэргэ оҕолору илдьэн үөрэнээччилэрэ ити курдук ааттаах-суоллаах тэрээһиннэргэ кыайалларыгар хас биирдии Арассыыйа учуутала баҕарар.

Бу хас тэрээһиннэр ахсын Марианна Федоровна оҕолорго иитэр, биллэрэр-көрдөрөр өттүн сатабыллаахтык аттарар. Маныаха үөрэнээччилэр өрөспүүбүлүкэ тас өттүнээҕи күөн күрэстэргэ төрөөбүт нэһилиэктэриттэн аан маҥнай тэйэн кытталларын бэлиэтиир тоҕоостоох.

Улуус, эрэгийиэн таһымнаах кэмпириэнсийэлэри аахпакка туран, учуутал уонунан үөрэнээччитэ саамай үрдүк наҕараадалары ылары ситиспиттэрэ: Билим Аччыгый академиятын үс стипендиата, билим дуоктардарын үс стипендиата, СӨ Ил Дархана Айсен Николаев стипендиата, СӨ Үөрэҕин министиэристибэтин гранын икки кыайыылааҕа. Бу кураанах сыыппара кэтэҕэр педагог күннээҕи сыралаах үлэтэ, дьиҥнээх идэтийии, үөрэххэ айымньылаах сыһыан, оҕолорго билиини саҕар уонна билим чинчийиитинэн дьарыктаналларыгар умсугутар сатабыла буолар.

Дьэ, ити курдук, соторутааҕыта М.К.Аммосов аатынан Хотугулуу-Илиҥҥи федеральнай университет учуонай сэбиэтин саалатыгар ыытыллыбыт, “Инникигэ хардыы” бырагыраама 30 сылыгар аналлаах уопсастыбаннас үөрүүлээх мунньаҕа буолан ааста. Өрөспүүбүлүкэ чулуу учууталларын ортолоругар ыччакка, үөрэнээччилэргэ аналлаах “Инникигэ хардыы” Арассыыйатааҕы билим-социальнай бырагыраама бэрэстэбиитэлэ, үөрэнээччилэри чинчийэр үлэҕэ, билимҥэ бэлэмнээһинин уонна айымньылаах үлэтин, тус сыалын, үгүс сыллаах сыралаах үлэтин иһин Марианна Федоровна Филипповаҕа “Новатор-педагог” түөскэ иилинэр бэлиэни туттарда.

Аныгы кэмҥэ суолталаах оҥоһуу өй быһаарыытыгар сигэннэххэ, новатор-педагог үөрэҕи, билиини иҥэрэрин таһынан, үөрэх көдьүүстээх, хардарыта көхтөөх уонна чопчу буоларын туһугар оҕону үөрэтиигэ, иитиигэ саҥа, сайыннарар ньымалары, технологияны уонна идиэйэни туһанар   диэн быһаарар. Холобур, геймификация, бырайыактыыр үлэ,  сыыппара уонна уһуйуу нөҥүө. Кинилэр оҕону олох аныгы усулуобуйатыгар сөп түбэһэн үөрэнэргэ, толкуйдуурга, ырытарга, сайдарга, кыахтарын сөпкө туһанарга үөрэтэллэр.

Марианна Федоровнаны үрдүк наҕараадатынан эҕэрдэлиибин уонна бары саҥа саҕалааһыннаргар ситиһиини баҕарабын!

В.Ф.Тихонова.