«Үрдүкү технологиялаах мэдиссиинэ көмөтө» пуонда аадырыстаах көмөнү оҥоруоҕа

Саха сирэ «Үрдүкү технологиялаах мэдиссиинэ көмөтө» аһымал пуонданы кытта бииргэ үлэлэһэр туһунан сөбүлэстэ. Стратегическай сөбүлэһиигэ алтынньы 9 күнүгэр Санкт-Петербург куоракка Ил Дархан Айсен Николаев уонна пуонда Сэбиэтин бэрэссэдээтэлэ Сергей Фурсенко илии баттаатылар диэн sakha.gov.ru иһитиннэрэр.

Докумуоҥҥа суруллубутунан, өрөспүүбүлүкэҕэ хамсанар кыахтара кэһиллибит олохтоохторго аадырыстаах мэдиссиинэ көмөтүн оҥоруу, пуонда аһымал бырагыраамаларыгар сөптөөх  усулуобуйаны тэрийии уонна Саха сиригэр адаптивнай успуорду сайыннарыы көрүллэр. Байыаннай дьайыы бэтэрээннэригэр ураты болҕомто ууруллуоҕа.

«Үрдүкү технологиялаах мэдиссиинэ көмөтө» аһымал пуондата 2023 сыллаахха тэриллибитэ. Сыаната 10 мөл. солкуобайтан тахса буолуон сөптөөх протезтааһыҥҥа уонна хамсанар кыаҕы чөлүгэр түһэрэр эмтэнии бырагыраамаларыгар наадалаах үбү-харчыны хомуйарга көмөлөһөр. Пуонда көрүүтүгэр-харайыытыгар илиилэрин-атахтарын сүтэрбит Саха сирин икки олохтооҕо  баар. Кинилэртэн биирдэстэригэр микропроцессорынан салайыллар атах протеһын туруорарга көмө оҥоһулунна; оттон иккиһигэр – электромеханическай үрдүкү технологиялаах илии протеһын оҥордулар.