Үрэхтэр муустара халыҥаата дуо?

Хоту дойду балыксыттара эбэлэригэр балыктыы бараары хаһан үрэхтэрэ тоҥорун кэтэһэллэр.

Холобура, Аллайыаха улууһун Чокуурдааҕар ааспыт нэдиэлэттэн буурҕа түһэн, кыра үрэхтэри – Дьолоону, Аллайыаханы хаар баттаан, уутун таһааран сүгүн тоҥорбокко турар дииллэр. Ол курдук, үрэх ортотугар муус халыҥа 3 эрэ см тиийбит. Кытыыларын диэкинэн син 6-7 см үһү.

Буурҕа тохтообот, аста-аста хаттаан тыалырар. Хаардыыр. Балыксыттар үрэх тоҥорун, тымныы кэлэрин кэтэһэллэр аҕай. Бултаммыт балык тута тоҥорун курдук. Аанньа тымныйбатаҕына, бултаммыт балык тас өттө хараарар, иһэ кырыаланар.