Ырыа-үҥкүү дьоро киэһэтэ — ураты туруоруу

«Туймаада» стадиоҥҥа «Биһиги — Азия оҕолоробут! Биһиги — Күн оҕолоробут!» диэн музыкальнай туруоруу буола турар. Режиссер — Михаил Степанов.

Манна элбэх ырыа ылланна, дойду устуоруйатын ырыа нөҥүө көрдөрдүлэр. Мээнэҕэ «ырыа — олох аргыһа» диэбэттэр ээ…

Бастаан эстрада сулустара Байбал, Лэгэнтэй, Василий Новоприезжай, Дуолан Трофимов, Виталий Очиров Дьөһөгөй оҕотун туһунан ыллаатылар. Лэгэнтэй »Сайылыкка ыһыах буолла…» ырыатынан стадиону, дьэ, хамсатта!

Көрөөччүлэр ойон туран, билэр-билбэт дьоннорун кытта оһуохайдаан бардылар.

Ааспыт үйэ 60-с, 70-с сыллартан саҕалаан, сахалыы, нууччалыы, омуктуу ырыалар ылланнылар.
Социальнай ситимнэргэ аатырбыт, Виктор Цой фаната, 3-с кылаас үөрэнээччитэ Баир Намбаров гитара тутуурдаах тахсан, «Группа крови» ырыаны ыллаабытыгар, ыччаттар эмиэ туран эрэ ылластылар. «Якутск — город мой» ырыа элбэх сүрэҕи сылааһынан толордо.

Кэскил Баишев «Сахалыы харысхалым» ырыатынан дьону сэргэхситтэ. Маны тэҥэ, аныгылыы ырыаларынан ыччат сөбүлүүр ырыаһыттара Максим Дмитрьев, Инвент, Понсаш, Анхаров, Фиеста, уо.д.а. кыттыбыттара эдэрдэргэ бэлэх буолла. Кинилэр бу күннэргэ Комсомольскай болуоссакка кэнсиэртээн, элбэх дьону муспуттара.
Көлүөнэлэр ситимнэрин Аскалон Павлов уонна кырачаан ырыаһыт тыыннаах доҕуһуолунан «Эр хоһуун буол» ырыанан ситимнээн көрдөрдүлэр.

Ырыаһыт Умсуура үп-үрүҥ комбинезоннаах стадиоҥҥа матассыыкылынан элээрдэн киирэн, «Мохсоҕоллор» ырыатын тардан кэбистэ.

Туруоруу устатын тухары тыһыынчанан оҕолор үҥкүүлээн киэргэттилэр. Улуустартан 13 үҥкүү ансаамбыла кэлэн кытынна.
Стадион 12 тыһыынча киһини киллэрэр кыахтаах. Бу да сырыыга тобус-толору буолла. Кыайан киирбэтэх дьоҥҥо стадион таһыгар, Комсомольскай болуоссакка улахан экрааны туруоран, быһа көрдөрө турбуттара эмиэ бэртээхэй идиэйэ эбит.

Ахсыс «Азия оҕолоро» оонньуулар умнуллубат түгэннэри, бэртээхэй көстүүлэри бэлэхтээтилэр!

Оонньуулар уоттарын умуруоран, маҕан шаардары халлааҥҥа көтүтэр, «Азия оҕолорун» гимнэ ылланар кэмигэр кыыһар саҕахха киирэн эрэр күн былыт быыһыттан тахсан, тиһэх көмүс сардаҥаларын күлүбүрэччи кутан, быраһаайдаһар курдук буолла… Аныгыскы сыпыына көрсүөххэ диэри, «Азия оонньуулара»!

Ыҥырыылаах ыалдьыт Niletto  хас да ырыатын, ол иһигэр «Любимка'» диэн хит ырыатын ыллаата. Көрөөччүлэрин кытта сибээһин бэркэ тутар эбит. Волонтер оҕолор сыананы төгүрүйэн кэбиспиттэригэр, онно түһэн, алтыста. Тэрийээччилэр оҕолорго бэртээхэй киэһэни бэлэхтээтилэр.