«Үрүҥ хаар алгыһа» бэстибээл хоһоон киэһэтинэн түмүктэннэ
![](https://sakha-sire.ru/wp-content/uploads/2023/10/2d8730b9-ba27-4fa2-8283-fb3a34a2c3a7-1060x596.jpeg)
Алтынньы 13 күнүгэр Өксөкүлээх Өлөксөй аатынан Норуоттар доҕордоһууларын дьиэтигэр сэттис төгүлүн ыытыллар «Үрүҥ хаар алгыһа» норуоттар икки ардыларынааҕы бэстибээл түмүктүүр тэрээһинэ — Поэзия киэһэтэ буолла.
Москваттан, Архангельскайтан, Башкортостантан, Татарстантан, Казахстантан, Кыргызстантан, Азербайджантан кэлбит бэйиэттэр хоһооннорун саха суруйааччылара сахалыы тылбаастаан аахтылар.
Ону тэҥэ, Норуоттар доҕордоһууларын дьиэтин иитиллээччилэрэ атын омуктар тылларынан ырыалары бэлэхтээтилэр. Опера, балет тыйаатырын солистката Мария Михайлова кэрэ ырыатынан умсугутта.
Дьаамсыктар сыдьааннара ыалдьыттары ойутан туруоран, былыргы үҥкүүнү үҥкүүлэттилэр. Төрүттэрин устуоруйатын кэпсээтилэр, «Бубенцы над Леной» кинигэни бэлэхтээтилэр.
![](https://sakha-sire.ru/wp-content/uploads/2023/10/aec4a631-f564-4fea-9318-062f0190a36c.jpeg)
![](https://sakha-sire.ru/wp-content/uploads/2023/10/b2001dde-19b1-4353-b8aa-1c0564808073.jpeg)
![](https://sakha-sire.ru/wp-content/uploads/2023/10/e5ad09b7-5fc6-4d59-8b64-1089acdd43b9.jpeg)
Дьэ, чахчы, сылаас тыыннаах, хомоҕой тыллаах, ырыа ымыылаах, истиҥ-иһирэх иэйиилээх киэһэ буолла.
Санатар буоллахха, Саха сирин суруйааччылара Алампа хоһоонун 32 омук тылынан тылбаастаан, кинигэ таһаарбыттара. Бу бэстибээлгэ сүрүннээн Алампа хоһоонун бэйэлэрин тылларыгар тылбаастаабыт бэйиэттэр кэлбиттэр.
Манна норуоттар доҕордоһуулара бөҕөргүүр, суруйааччылар ыкса сибээстэрэ олохтонор, хардарыта тылбаастар, кинигэлэр тахсаллар.
Сообщить об опечатке
Текст, который будет отправлен нашим редакторам: