Үрүҥ көмүс волонтердар тулаайах оҕолордуун үлэлэһэллэр

2016 сылтан «Молоды душой» түмсүү үрүҥ көмүс волонтердара тулаайах уонна төрөппүт көрүүтэ-истиитэ суох хаалбыт оҕолор Өрөспүүбүлүкэтээҕи анал коррекционнай оскуолаларын кытта ыкса үлэлэһэллэр. Кинилэр Анна Филиппова «Наставничество» бырайыагын чэрчитинэн, «Эбээлэр туора дьон буолбатахтар» диэн бырайыагынан үлэлииллэр.

Оскуола-интэринээт оҕолоро Ресурснай кииҥҥэ үөрүүнэн сылдьаллар, онно эбэлэргэ анал кэбиниэт бэриллибит. Эбэлэр Владивосток куорат үрүҥ көмүс волонтердарын кытта онлайн-көрсүһүү оҥорбуттара. Онно үүнэр көлүөнэни иитиигэ эбэлэр-эһэлэр оруолларын туһунан кэпсэппиттэрэ, уопуттарын атастапыттара.

Манна оҕолор эмиэ кыттыбыттара, хомуска оонньообуттара, эбэлэри кытта ыытар тэрээһиннэрин туһунан кэпсээбиттэрэ. Тулаайах оҕолорго олоҕу билбит, уопуттаах, саастаах көлүөнэни кытта алтыһыы элбэҕи биэрэр. Онон эбэлэр туора дьон оҕолоро диэн атарахсыппакка, кинилэри иитиигэ эмиэ кыттыһаллар. Көрсүһүү кэнниттэн Анна Мухаметова аанньалы оҥорууга маастар-кылааһы ыыппыта.

Үлэ, социальнай сайдыы министиэристибэтэ.