“Үрүҥ үөт” сайылык оҕото

Мэҥэ Хаҥалас улууһугар Сыымах бөһүөлэгиттэн икки биэрэстэлээх сиргэ сэбиэскэй кэмҥэ тигинээн-таҕынаан олорбут «Үрүҥ үөт» сайылык баар этэ. Биһиги, хас да көлүөнэ ыччат, ол сайылыкка улааппыппыт.

“Үрүҥ үөккэ” сүүрбүт-көппүт, ойор күннээх оҕо саастарын атаарбыт оҕолортон кэлин улууска, өрөспүүбүлүкэҕэ биллэр дьон үүнэн-үрдээн тахсыбыттара.

Кинилэртэн биирдэстэрэ — Емельянов Михаил Михайлович, Саха Өрөспүүбүлүкэтин “Гражданскай килбиэн” бэлиэ хаһаайына, СӨ тыатын хаһаайыстыбатын үтүөлээх үлэһитэ, СӨ агропромышленнай комплексын бочуоттаах үлэһитэ, СӨ тыатын хаһаайыстыбатын туйгуна, Мэҥэ Хаҥалас улууһун уонна 1-кы Баатара нэһилиэгин бочуоттаах олохтооҕо.

Мин кинини оҕо эрдэҕинээҕитин бэркэ диэн өйдүүбүн: сүрдээх сэмэй, окко-маска умньанар мэнигэ суох, чороччу улаатан эрэр уолчаан этэ. Сайылык оҕолорун кытта тэҥҥэ сүүрэн-көтөн, моҕотойдоон, абырҕал хомуйан,  тамыйах тутан, титииккэ ынах киллэрсэн сылдьара. Ийэтэ Өрүүнэ ыанньыксыт, аҕата Мэхээлэ бостуук этилэр. Кинилэри кытта биһиги биир дьиэҕэ хас да ыал буолан дьукаах олорбуппут.  Өрүүнэ элбэх кэпсээннээх, түргэн туттунуулаах этэ. Мэхээлэ наһаа сымнаҕас майгылааҕа, сүрдээх үчүгэйдик сахалыы туойара. Атын үрдүгэр хап гына олордо да, бастаан киҥинэйэн, онтон куолаһа чөллөрүйэн, киһи иһиттэр истиэн курдук ыллыыра. Биһиги, сайылык оҕолоро,  киэһэ киинэҕэ бараары, Мэхээлэни батыһа сылдьан: «Баһаалыста, бүгүн ынахтаргын эрдэ хомуйан аҕалаар,» — диэн ааттаһарбыт. Кини онно улгумнук сөбүлэһэрэ уонна ынахтарын чаас курдугунан эрдэ аҕалара. Оо, онно биһиги үөрэр да этибит!  Тоҕо диэтэххэ, ынахпытын ыы охсон баран, “Өргүүдэккэ” (сайылыктан 4 биэрэстэлээх сиргэ) киинэ көрө ыстанарбыт.  Сайылыкка оҕо-уруу элбэх этэ, сорох ыаллар уончалыы оҕолоохторо. Кыралыын-улаханныын тоҕо анньан тиийэрбит. Миша онно оҕолор быыстарыгар эмиэ баар буолааччы.

Мишаны кэлин улаатан баран, Бэдьимэҕэ учуутал кыыһы кэргэн ылан, оҕолонон-урууланан ньир-бааччы олорор диэн истэрим. Сылгынан дьарыгырарын хаһыаттан ааҕан, тэлэбиисэргэ  көрөн, билэрим уонна биһиги сайылыкпыт оҕото  диэн киэн туттар буоларым!

Кэргэнин Анна Прокопьевнаны кытта маҥнай учууталлар мунньахтарыгар сылдьан билсибитим уонна көрүстэхпитинэ, үөрэ-көтө кэпсэтээччибит.

Кинилэр уоллара Рома Емельянов биирдэ Наахараҕа мас тардыһа кэлэн баран табаарыс уолунаан биһиэхэ хоммуттара. Онно мин бэйэм «Тоҕус ньуоска » диэн ааттыыр бурдук аспын оҥорон сиэппитим уонна сарсыарда физзалга баралларыгар биир “Тоҕус ньуосканы” табаарыстаргытыгар амсатаарыҥ диэн биэрэн ыыппытым. Ону оҕолор бэркэ сөбүлээн сиэбиттэр этэ. Арай киэһэ барыан иннинэ Рома уолунаан киирэн кэллилэр уонна: «Елена Петровна, миэхэ бу ас рецебин биэриэҥ дуо? “, — диэтэ.  Биэрдэҕим дии. Онтон дойдутугар тиийэн баран, ийэтигэр сакаастаан буһартарбыт, кэлин бэйэтэ оҥорор буолбут.

Саамай дьиктитэ уонна үөрүүлээҕэ — ол кэнниттэн хас эмит сыл ааспытын кэннэ Рома миигин сыбаайбатыгар ыҥыран соһуттаҕа үһү! Туох эрэ мэһэйдээн, ол сыбаайбаҕа кыайан барбатаҕым да, ол түгэни олус күндүтүк саныыбын!

Билигин саныыбын ээ, Анна Прокопьевна уонна Михаил Михайлович оҕолорун үчүгэйдик ииппиттэр эбит диэн.

Сылгыһыт үлэтэ киһиттэн элбэх сыраны-сылбаны, тулууру-дьулууру, билиини-көрүүнү эрэйэр үлэ. Маны барытын Михаил Емельянов тоҥтон толлубат, ириэнэхтэн иҥнибэт, сылайбат сындааһыннаах буолан үлэлээн-хамсаан, ситиһиилиин сиэттиһэн кэллэҕэ дии саныыбын.

Ол да иһин үлэтэ-хамнаһа сыаналанан, элбэх бочуоттаах ааттарга тигистэҕэ.

Михаил Михайлович, хомойуох иһин, үлэтин үгэнигэр сылдьан олохтон барбыта. Ол эрэн кини сыспай сиэллээҕи иитиигэ, ат успуордун сайыннарыыга киллэрбит кылаата өрөспүүбүлүкэҕэ уонна Мэҥэ Хаҥалас улууһугар умнуллуо суоҕа.

Кылгас ахтыыбын “Сылгыһыттарга” анаан суруйбут хоһооммунан түмүктүүбүн. Бу кулун тутар 21-22 күннэригэр Мэҥэ Хаҥалас улууһун Хара нэһилиэгин “Куоҥ Харах” ипподромугар ыытыллар өрөспүүбүлүкэтээҕи “Сылгыһыт күнүгэр” бары сылгыһыттар ситиһиилээхтик кыттыахтара диэн баҕа санаабын тиэрдэбин.

Сылгыһыт

Тоһуттар тымныыга тоҥууну,

Сыралҕан куйааска буһууну

Тулуйан кэллэҕэ сылгыһыт,

Сындалҕан сырыылаах айанньыт.

Эн дьиҥнээх эр хоһуун буолаҕын,

Эн хорсун хотойго тэҥнээххин,

Дьөһөгөй оҕотун доҕоро,

Дьиктилээх айылҕа оҕото!

Аллаах ат үрдүгэр олорон,

Алааһы барытын сыыйаҕын,

Ардыгар уостаргын хоҥнорон,

Айаара , арчылыы туойаҕын.

Хахсааттан , силлиэттэн толлубат,

Хаһыҥҥа, хатыыга хаайтарбат

Сылайбат-элэйбэт күүстээххин,

Санааҕын түһэрбэт саҥнааххын!

Хаартыска: А.Емельянова ыытта.

Елена Прокопьева, Мэҥэ — Хаҥалас, » Таммахтар» айар холбоһук.