ЫРЫСЫАП: “Хатыҥ чараҥ” салаат

С. К. Макаров аатынан Чурапчы гимназиятын саха тылын, литэрэтиирэтин учуутала, СӨ үөрэҕин туйгуна, Бүтүн Арассыыйатааҕы төрөөбүт тыл, литэрэтиирэ учууталларын күөн күрэһин лауреата Сардаана Гоголева ырысыаба:

Туох ирдэнэр:

Тэллэй — 200–250 г

Эриэппэ луук — 1 кыра

Сибиинньэ этэ (куурусса) этэ — 350–400 г

Сымыыт үрүҥэ — 4 устуука

Сибиэһэй оҕурсу — 1 улахан эбэтэр 2 кыра

Чернослив — 150 г

Майонез — кыратык.

Хайдах астыыбыт:

— Тэллэйи ууга буһарабыт. Луугу ыһаарылыыбыт, онно тэллэйи кутан тэптэрэ түһэбит, туустуубут, тумалыыбыт. Эти, сымыыты ууга буһарабыт, уһун синньигэс гына кырбыыбыт. Черносливы 10–15 мүн. сылаас ууга туруора түһэн сымнатабыт (2–3 устууканы киэргэтэргэ хаалларабыт) уонна эмиэ уһун субурҕа гына кырбыыбыт. Ньолбоҕор иһиккэ бэлэмнэммит аһылыктары араҥанан уурталыыбыт. Маҥнай черносливы тэлгэччи кутабыт, үрдүгэр тэллэй уурабыт, үрдүнэн майонезтыыбыт, ол кэнниттэн эти тэлгэтэ уурабыт, сиэккэ курдук кыратык майонез эбэбит. Ол үрдүгэр сымыыт үрүҥүн, оҕурсу кутабыт. Аҕыйах оҕурсуну майонезтаан баран, үрдүгэр иһиппит устатынан уурталыыбыт. Саамай бүтэһигэр хаалбыт аҕыйах черносливы туора уурталыыбыт, оччоҕо хатыҥ мас курдук көстүөхтээх. Бэрт судургу, минньигэс салаат.