ЫРЫСЫАП: Мороженай

РФ уопсай үөрэхтээһинин бочуоттаах үлэһитэ, “СӨ үтүөлээх учуутала” бочуоттаах аат хаһаайына, Дьокуускай куорат 26‑с нүөмэрдээх оскуолатын саха тылын, литэрэтиирэтин учуутала Марианна Борисова ырысыаба:

Туох ирдэнэр:

Чөчөгөй (20–35%) — 450 мл

Сымыыт уоһаҕа — 4 устуука

Саахар — 120 г

Ванилиннаах саахар — 1–2 ост. ньуоска

Отон — кыратык.

Хайдах астыыбыт:

— Чөчөгөйү халыҥ иһиккэ кутабыт. Ититэбит (оргуйуо суохтаах). Чөчөгөй итийэр кэмигэр сымыыт уоһаҕын саахары кытта көпсөркөй буолуор диэри булкуйабыт. Итии чөчөгөйү саахардаах уоһахха тохтоло суох сэрэнэн булкуйа-булкуйа кутабыт. Ол эрээри, олус күүскэ булкуйбаппыт — үрдүгэр хойуу күүгэн үөскүөн сөп.

Булкааһы атын көстүрүүлэҕэ кутан баран, кыра уокка булкуйа-булкуйа хойдуор диэри сылытабыт. Маассабыт оргуйбатын курдук тохтообокко булкуйабыт. Тохтоон хааллахха уоһах бөлөнүйэн хаалыан сөп. Уоттан таһааран баран, сойута таарыйа хас да мүнүүтэ булкуйабыт. Сойбут маассаҕа кыратык отон эбиэххэ сөп да, мин отоннообоппун.

Бэлэм маассаны иһиккэ кутан 6–7 чаас морозильникка туруорабыт. Бастакы балтараа чаас 20–30 мүн. буола-буола, күүскэ, кылгас кэмҥэ миксеринэн ытыйтарабыт (маассабыт сылыйбатын курдук). Ол кэнниттэн өссө ытыйабыт, итинник барыллаан биэстэ-алтата булкуйуохха сөп.