Салгыы
До выборов президента РФ
00 дней
:
00 часов
:
00 минут
:
00 секунд
Үс дьоруойдаах Хаптаҕай нэһилиэгэр дьоро күн

Үс дьоруойдаах Хаптаҕай нэһилиэгэр дьоро күн

Ааптар:
05.11.2023, 15:09
https://t.me/meginokangalasskiy
Бөлөххө киир:

“Уруйдан, Улуу Олоҥхо, Манчаары дойдутугар!” үгэс буолбут Сахабыт сиригэр Олоҥхо күнүгэр аналлаах тэрээһиннэр сэтинньи 1 күнүттэн ахсынньы 5 күнүгэр диэри Мэҥэ Хаҥалас улууһун нэһилиэктэригэр ыытыллаллара былааннанар.

Сэтинньи  1 күнүгэр үлэһит туруу дьоннордоох, үс дьоруойдаах Хаптаҕай нэһилиэгэр олоҥхоһут
Павел Григорьевич Романов – Мыланыыскай төрөөбүтэ 130 сылыгар аналлаах киэҥ далааһыннаах истиҥ тэрээһин ыытылынна.

Бу күн Хаптаҕайга биир төрүттээх-уустаах Таатта улууһун Тыараһа нэһилиэгин олохтоохторо ыалдьыттаатылар. Дьоро күн саха сиэринэн, өбүгэ үгэһинэн алгыс, арчы сиэринэн-туомунан саҕаланна. Алгыһы Альберт Терентьев түһэрдэ, сахалыы мааны мандар таҥастаах “Күөгэйэ” түмсүү Далбар Хотуттара ыалдьыттары арыылаах алаадьынан, кыынньар кымыһынан С.Н. Васильев аатынан түмэл дьиэтигэр айах тутан көрүстүлэр.

Олоҥхоһут Павел Григорьевич Романов – Мыланыыскай туһунан сиһилии сырдатар истиэндэ түмэл дьиэтигэр үөрүүлээх быһыыга-майгыга арылынна.
Альберт Егорович Терентьев олоҥхоһут Павел Мыланыыскай олоҕун, айар үлэтин сырдатан бэртээхэй иһитиннэрии оҥордо.

Дириҥ силистээх-мутуктаах Хаптаҕай нэһилиэгин историятын билиһиннэрдилэр, Россия худуоһунньуктарын сойууһун чилиэнэ Анна Прокопьевна Скрябина, Социалистическай үлэ Дьоруойа Гавриил Семенович Самсонов түмэл дьиэлэригэр, Гражданскай сэрии Дьоруойа Кеша Алексеев аатынан агро-оскуолаҕа  сырытыннардылар.

Дьоро күн үөрүүлээх чааһыгар биир төрүттээх-уустаах Хаптаҕай уонна Таатта улууһун Тыараһа нэһилиэгин баһылыктара Иван Прокопьевич Зыков уонна Прокопий Прокопьевич Турнин икки нэһилиэк инникитин бииргэ үлэлииргэ кэскиллээх санаанан салайтаран  сөбүлэҥ түһэристилэр.

Тыараһа баһылыга Прокопий Прокопьевич Турнин, тэрилтэ салайааччылара, көхтөөх общественниктара нэһилиэк олоҕун-дьаһаҕын сырдаттылар, Тыараһалар уруу-хаан көрсүһүүлэрин тэрээһинин көҕүлээбит, дьонун-сэргэтин хамсаппыт Антонина Семеновна Суходольскайаҕа махтал тылларын эттилэр.

Икки хаан-уруу төрүттээх нэһилиэктэр көрсүһүүлэрин таһымын үрдэтэн, Мэҥэ Хаҥалас улууһугар “Уруйдан, Улуу Олоҥхо, Манчаары дойдутугар!” Олоҥхо ыйын чэрчитинэн олоҥхоһут Павел Григорьевич Романов – Мыланыыскай “Кыыс Ньургустай Куо” олоҥхотун саҥа, ураты тыыннаан толордо биир дойдулаахпыт Саха Республикатын үтүөлээх артыыската Софья Иннокентьевна Сергучева – Баранова.

Улууспутугар үгэс буолбут Олоҥхо ыйа саҕаламмытынан Мэҥэ Хаҥалас улууһун культураҕа уонна духуобунай сайдыыга салалтатын салайааччыта Анна Руслановна Исакова, Г.Г. Колесов аатынан оройуоннааҕы норуот айымньытын киинэ “Олоҥхо Дьиэтин” уус-уран салайааччыта Айта Семеновна Васильева эҕэрдэлээтилэр.

Бу курдук киэҥ ис хоһоонноох, устуоруйаҕа киирэр, кэлэр өттүгэр кэскиллээх дьоро күн, олоҥхо истии киэһэтэ Хаптаҕай нэһилиэгэр үрдүк таһымҥа ааста.

Васильева Айта Семеновна
Г.Г. Колесов аатынан оройуоннааҕы норуот айымньытын киинэ “Олоҥхо Дьиэтин” уус-уран салайааччыта

+1
1
+1
0
+1
1
+1
1
+1
1
+1
0
+1
0
Бары сонуннар
Салгыы
23 февраля
  • -36°C
  • Ощущается: -36°Влажность: 73% Скорость ветра: 1 м/с

Сообщить об опечатке

Текст, который будет отправлен нашим редакторам: