Үс Хатыҥҥа диэри өрүһүнэн айаннаан тиийиэххэ сөп

Бэс ыйын 29-30 күннэригэр Туймаада ыһыаҕа буолар. Үгэс курдук, ыһыахха барарга суолга массыына бөҕө хаайтарар. Оттон Үс Хатыҥҥа диэри өрүһүнэн түргэнник айаннаан тиийиэххитин баҕарбаккыт дуо?

Ыһыахха тиийэргэ 203-с түөлбэттэн Жатайга диэри салгын олбохтоох аалларынан айанныахха сөп. «Ленатурфлот» атыыга отделын начаалынньыга Николай Баягантаев этэринэн, Жатайга диэри өрүһүнэн 30 мүнүүтэ айаннаан тиийэҕин.

— Субуотаҕа бастакы сырыыбыт сарсыарда 8 чааска буолуоҕа. «Парус» олорор дьиэ аттыттан 15 киһини олордор ааллар хоҥнуохтара. Чаас аҥаара айаннаан, Жатайга тиийэллэр. Айан сыаната — 1500 солкуобай. Баҕалаах элбэх буоллаҕына, икки суудунаны таһаарыахпыт. Жатайтан Үс Хатыҥҥа диэри илдьэр оптуобустар баар буолуохтара. Жатайтан барарга суолга харгыс суох. Оптуобуска туспа төлүүгүн. 200 солкуобайга диэн дуогабардаһа сатыахпыт, —  диэн Николай Баягантаев СИА-ҕа кэпсээтэ.