Үс игирэ ньирэй төрөөтө

Мэҥэ Хаҥалас улууһун Чүүйэ сэл. биир ынах үс ньирэйи төрөппүтүн туһунан сурах тарҕанна.

Ол төһө оруннааҕын билээри 330 сүөһү кыстаан турар “Чүүйэ” МУП генеральнай дириэктэрэ Афанасий Элегяевтан  туоһуластыбыт.

— Кырдьык, бэҕэһээ сарсыарда 9 ч. ааһыыта симментал боруода ынахпыт үс игирэ ньирэйи төрөтөн соһутта уонна үөртэ даҕаны. Ньирэйдэр туруктара үчүгэй уонна үһүөн оҕустар, — диэтэ Афанасий Элегяев.

Дьэ, бу курдук, ынах төрөөһүнэ сыыйа саҕаланан, үрүҥ илгэ үрүлүйүөҕэ.

Хаартыскаларга:  Хотоҥҥо саҥа төрөөбүт ньирэйдэр. Кылаабынай зоотехник-осеменатор Роман Алексеев көрө-истэ сылдьар.

Хаартыскалары А.Элегяев ыытта.