Бэҕэһээ, сэтинньи 17 күнүгэр, үс игирэчээннээх Васильевтар дьиэ кэргэттэрин Национальнай мэдиссиинэ кииниттэн үөрүүлээх быһыыга-майгыга дьиэлэригэр таһаардылар.
Бу үөрүүлээх күн дьоллоох төрөппүттэри, Александра Константиновнаны уонна Владимир Васильевиһы Национальнай мэдиссиинэ киинин генеральнай дириэктэрэ Станислав Жирков, кини 1-кы солбуйааччыта Александр Коростелев, СӨ Үлэҕэ уонна социальнай сайдыыга министиэристибэтин демографическай уонна дьиэ кэргэн бэлиитикэтигэр, эппиэкэ уонна попечительство департаменын кылаабынай исписэлииһэ Ирина Пирожкова, Дьокуускайга баар Ньурба улууһун бэрэстэбиитэлэ Прокопий Чымыров уо.д.а. истиҥник эҕэрдэлээтилэр. Александра Васильеваҕа «Үйэ оҕото» өрөспүүбүлүкэ тус сыаллаах хапытаалын сэртипикээтэ уонна бэлэх-туһах туттарылынна. Перинатальнай киин үлэһиттэрин болҕомтолорунан, сылаас сыһыаннарынан ийэ уонна игирэчээн уолаттар этэҥҥэлэр.
Васильевтар дьиэ кэргэттэригэр алтынньы 26 күнүгэр үс игирэчээн төрөөбүтэ. Ол иннинэ, үс оҕолоохтор – улахан кыыстара 11-с, уоллара 3-с кылааска үөрэнэллэр, кыра кыыстара оҕо уһуйааныгар сылдьар. Улахаттар үс бырааттаммыттарын истэн үөрүү, долгуйуу, кэтэһии бөҕөлөр. Ийэлэрэ Александра Константиновна Чаппанда орто оскуолатыгар математика учуутала.
Ыал аҕата Владимир үс игирэни күүтэллэрин туһунан истэн баран, аан бастаан олус соһуйбут, ол туһунан маннык кэпсиир: «Мин Накыыҥҥа үлэлиибин, арай биирдэ кэргэним звоннаан, тураҕын дуу, олороҕун дуу диэтэ. Мин турабын диибин, олороруҥ ордук буолуо диэн таайтаран эттэ. Ол иннинэ консультацияҕа сылдьыбыт. Мин таайа сатаатым, уол-кыыс оҕо, икки оҕо… арааһы бары толкуйдаатым, онтон туох эрэ дьиэктээх быһыылаах дии санаатым. Онтон үс оҕо диэбитигэр соһуйан, долгуйан саҥабыттан маттым. Чугаһынан даҕаны үс оҕо буолуо диэн өйбөр суох, бастаан улаханнык санаабатаҕым, онтон уоскуйан баран дьэ өйдөөн ылынным. Түгэнинэн туһанан, Национальнай мэдиссиинэ киинин үлэһиттэригэр улахан махталбын тиэрдэбин. Билиҥҥи үйэҕэ тапталы, дьиэ кэргэни өрө тутар буоллахха, дьол бэйэтэ кэлэр». Үөһээ айыыларбар, төрөөбүт дойдубар, айылҕабар махтанабын диэн элбэх оҕо амарах аҕата санаатын үллэһиннэ.
Кэнники сылларга иккилии-үстүү игирэлэнии элбээтэ эрээри, Ньурба улууһугар бу – сэдэх түгэн. Кырачааннар номнуо сахалыы ааттаахтар – Сандал, Эрчим уонна Уйгун.
Дьоллоох төрөппүттэр уолаттарын кытары сарсын дойдуларыгар Ньурбаҕа көтөөрү бэлэмнэнэ сылдьаллар, оттон дойдуларыгар ньээкэ уйаларыгар улахаттара долгуйа кэтэһэллэр.
Сэтинньи 25-26 күннэригэр саха тылын, литэрэтиирэтин, култууратын учууталларын өрөспүүбүлүкэтээҕи III сийиэһэ ыытыллаары турар. Сийиэскэ сүүрбэччэ…
Саха сирин уустара Москваҕа ыытыллыбыт «Клинок – үгэс уонна аныгы кэм» норуоттар икки ардыларынааҕы быыстапка…
Дьокуускайга ыытыллар Дмитрий Коркин аатынан норуоттар икки ардыларынааҕы күрэхтэһиигэ Беларусь сүүмэрдэммит хамаандатын састаабыгар эр дьоҥҥо…
Алдан улууһун борокуратуурата сокуону кэһэн азартнай оонньуулары тэрийиигэ уонна ыытыыга буруйданар улуус икки олохтооҕун утары…
Дьокуускай куорат дьаһалтатыгар "Кыһын Саха сириттэн саҕаланар" өрөспүүбүлүкэтээҕи бэстибээл тэрийэр хамыыһыйатын мунньаҕа буолла. Мунньаҕы куорат…
Муома улууһун Кустуур сэлиэнньэтигэр сэтинньи 6 күнүгэр И.Н. Слепцов аатынан агро-оскуола «Уйа» бырайыагын чэрчитинэн тутуллубут…