Үс киһи өлүүлээх баһаарынан холуобунай дьыала тэрилиннэ

Бэҕэһээ Мэҥэ Хаҥалас улууһун Майа сэлиэнньэтигэр чааһынай дьиэҕэ улахан баһаар тахсан, үс киһи суорума суолламмытын туһунан суруйбуппут.

Баһаарга эдэркээн ыал – 27 саастаах эр киһи, 22 саастаах кэргэнэ уонна кинилэр 5 саастаах кыыстара суорума суолланнылар.  48 кв. м иэннээх олорор дьиэ баһаарга былдьанна.

Силиэстийэлиир кэмитиэт Саха сиринээҕи салаатын илин эҥэр оройуоннарын икки ардыларынааҕа силиэстийэлиир отдела сэрэҕэ суох буолууттан икки уонна онтон элбэх киһи өлүүлээх түбэлтэтэ тахсыбытынан холуобунай дьыала тэрийдэ.

Сабаҕалааһын быһыытынан, өлүү  төрүөтүнэн буруоттан тумнастыы буолбут. Холуобунай дьыала чэрчитинэн, суут эспэртиисэтэ ананна, быһылаан туохтан тахсыбыта чопчуланар.