Үстээх уолчаан куолайыттан тимир харчылары хостообуттар!

Биэстээх уонна уоннаах тимир харчылар оҕочоон куолайыгар туран хаалбыттар.

Национальнай мэдиссиинэ киинигэр тимир харчылары ыйыстыбыт үстээх оҕочоону киллэрбиттэр. Бу туһунан ЯСИА суруйар.

Уолчаан сөтөллөрө уонна силэ наһаа тахсар буолбута дьиксиннэрбит. Суһал эпэрээссийэни эндоскопист-быраас, Национальнай мэдиссиинэ киинэ — 1 №-дээх балыыһа эндоскопияҕа отделениетын сэбиэдиссэйэ Мария Еремеева оҥорбут.

—Төрөппүттэрэ оҕо харчыны ыйыстыбыт күнүгэр тута балыыһаҕа кэлбиттэрэ. Тимир харчылар оҕо куолайыгар турбуттара биллибитэ. Эпэрээссийэ этэҥҥэ ааһан, харчылары ыларга туох да уустугу көрсүбэтибит. Билигин оҕо хирургическай отделениеҕа быраастар кэтээн көрүүлэригэр хаалла, — диэн ЯСИА-ҕа Мария Еремеева иһитиннэрбит.

ЯСИА суруналыыһа Саина Титова суруйарынан, быраастар сэтинньи, ахсынньы ыйдарга оҕолор ону-маны ыйыстан балыыһаҕа киирэллэрэ үксээбитин бэлиэтээбиттэр.

—Атын эттиги ыйыстыы кутталлаах, куолайы дьуккурутуон, хайа анньыан, бааһырдыан, араас барыта буолуон сөп. Ону сэргэ, бүөлүү түһэн, бэл, уу да кыайан киирбэт буолан хаалыан сөп, — диэн эппит эндоскопия отделениетын сэбиэдиссэйэ Мария Еремеева.

Национальнай мэдиссиинэ киинин быраастара маны таһынан, ахсынньы саҥатыгар 16 саастаах оҕону быыһаабыттар. Кыысчаан улахан уҥуоҕу ыйыстан кэбиспит. Кыысчааны уопуттаах эндоскопист-быраас Александр Кларов эпэрээссийэлээбит.

Тыынар уоргаҥҥа туора эттик киирэрэ улахан кутталлаах. Национальнай мэдиссиинэ киинин — 1 №-дээх өрөспүүбүлүкэтээҕи балыыһа эндоскопист-бырааһа Владислав Протодьяконов соторутааҕыта суһал эпэрээссийэни оҥорбут. Оҕо бронхатыгар (хабарҕа салгыны тыҥаҕа аһарар салаалара) эриэхэни булан ылбыттар. Оҕо барахсан түөрт күнү быһа тохтоло суох сөтөллүбүт.

ЯСИА уонна «Саха сирин» саайта бу күһүн Саха сирин быраастара кыыс куртаҕыттан чөмөх баттаҕы хостоон ылбыттарын туһунан суруйан турар. Чөмөҕөлөһөн хаалбыт баттах диаметра 30 см кэриҥэ, кыыс куртаҕын сыыһын толорон кэбиспитэ бэлиэтэнэн турар.

Ол туһунан манна ааҕыаххытын сөп: https://sakha-sire.ru/byraastar-kyys-kurtagyttan-chemeh-battagy-ylbyttar/