Үс сүүстэн тахса ыйытыы киирдэ

Ил Дархан Айсен Николаевы кытта «Прямая линия» ыытыллара чугаһаата. Бүгүҥҥү иһитиннэриинэн номнуо 300-тэн тахса ыйытыы киирбит.

—Саха сирин бары улуустарыттан төлөпүөннүүллэр. Ордук элбэх ыйытыыны Дьокуускай, Алдан, Ленскэй, Мииринэй, Нерюнгри, Сунтаар уонна Өлүөхүмэ олохтоохторо биэрдилэр. Дьон-сэргэ ордук суол-иис, уопсастыбаннай тырааныспар, ОДьКХ, социальнай эйгэ боппуруостарыгар болҕомтолорун уурар. Доруобуйа харыстабылын туһунан эмиэ ыйыталлар. Колл-киин үлэтэ тиһиктээхтик салҕанар, — диэн ЦУР салайааччыта Василий Десяткин иһитиннэрэр.

Санатан эттэххэ, СӨ Ил Дарханын Айсен Николаевы кытта быһа эпиир Өрөспүүбүлүкэ күнүгэр, муус устар 27 күнүгэр, 18:00 ч. ыытыллар. Быһа эпиир «Саха» НКИХ, «Якутия 24», «Россия 24» ханаалларга көстүөҕэ. «Тэтим», «Радио России», «Виктория Саха, «СТВ-радио» араадьыйаларга иһиллиэҕэ.

Ыйытыыларгытын эрдэттэн бу нүөмэргэ эрийиэн биэриэххитин сөп: 8 (4112) 506-006. Ону сэргэ, @voprosGlaveYakutii_bot телеграм-бот нөҥүө эмиэ туталлар.

СӨ Ил Дарханын уонна Бырабыыталыстыбатын пресс-сулууспата