«Үс төгүл үс» кыайыылаахтара билиннилэр

«Үс төгүл үс» диэн төхтүрүйэн ыстаныыга күрэс «Дьулуруйар Ньургун Боотур» стадиоҥҥа буолла.

«Үс төгүл үс» күрэскэ 70 кг. үөһээ ыйааһыннаахтарга ааттаах-суоллаах биллэр-көстөр күрэсчиттэр кытыннылар. Түмүккэ кыайыылааҕынан Владислав Попов (Нам) таҕыста. Кэбээйи хамаандатыттан кыттыбыт Яков Дмитриев иккистээтэ. Үһүскэ Үөһээ Бүлүү күрэсчитэ Айсен Ботуев таҕыста.

70 кг диэри ыйааһыннаахтарга уон алта күрэсчит күөн көрүстэ. Манна Ньурба хамаандатын спортсмена Валентин Афанасьев бастаата. Тилэх үктэһэн иккискэ Руслан Слепцов (Мэҥэ Хаҥалас) таҕыста. Үһүс бириистээх миэстэни Александр Пшенников (Өлүөхүмэ) ылан дьонун-сэргэтин үөртэ.

Бу күрэскэ уолаттарга Владимир Потапов (Сунтаар) кыайыылаах таҕыста. Кыргыттарга Намтан кыттыбыт Анастасия Матвеева бастаата. Дьахталларга Уус Алдан күрэсчитэ Евгения Адамова кыайда.

Сарсын стадиоҥҥа төрүт оҕунан ытыыга, сүүрүүгэ, хапсаҕайга уонна таас көтөҕүүгэ күрэхтэһии буолуоҕа.