Үс улуус үтүө көмөтө

Бу күннэргэ Арассыыйаҕа Ийэ күнүн көрсө Владивосток, Хабаровскай байыаннай чаастарыгар баар уолаттарга анаан «Дьиэм аһа» диэн аахсыйа биллэриллибитэ. Бу аахсыйаҕа куораттан чугас сытар үс  улуус – Горнай, Нам, Хаҥалас кытыннылар. Ыҥырыыны ылынан, бу улуустар олохтоохторо ас бөҕө астаан тута Дьокуускай куоракка киллэрэн туттардылар.

Бу аахсыйа туһунан волонтер ийэ Светлана Диодорова-Лаврентьева кэпсиир:

— Арассыыйаҕа Ийэ күнүн көрсө Владивосток, Хабаровскай куораттарга байыаннай чаастарга баар уолаттарбытыгар анаан «Дьиэм аһа» аахсыйа биллэрбиппит. Өрүс суола аһылла илик буолан, чугас сытар улуустарга биллэрбиппит. Үөрүөхпүт иһин бу үс улуус көхтөөх баҕайытык хомуйаннар, ас бөҕөнү хомуйан аҕаллылар. Нам улууһун дьахталларын түмсүүтүн салайааччыта Ирина Винокурова, Хаҥалас улууһун Булгунньахтаах сэлиэнньэтиттэн Айталина Васильева, Горнай улууһуттан  Ксения Васильева тэрээһиннэринэн ийэлэр, эбээлэр эдьиийдэр астаан ыыттылар. Бу астар Владивосток 155-с Сергеевка, Уссурийскай байыаннай чаастарыгар сытар уолаттарга барыахтара. Истэ-билэ сылдьар буолуохтааххыт, байыннай эрэсиим буолан, уолаттар уоппускаҕа кыайан кэлбэккэ сылдьаллар. Биһиги ыҥырыыбытын ылынан элбэх киһи көмөлөһөр – ол биһигини кынаттыыр, уолаттар үтүөрэллэригэр олук буолар.