Үс улууска биэс муоста өрөмүөннэниэ

Сунтаар, Өлүөхүмэ уонна Мииринэй оройуоннарыгар өрүһү туоруур муосталар саҥаттан тутуллуохтара.

2025 сылга муосталары тутуу «Олох инфраструктурата» национальнай бырайыак чэрчитинэн ыытыллыахтара.

Өрөспүүбүлүкэҕэ Массыына суолугар управление хапытаалынай тутууга салаата иһитиннэрбитинэн, Улахан Харыйалаах (40,1 погоннай миэтэрэлээх, кытылтан киирэр сирин кытта  1 км) уонна Дьороху (24,58 пог. миэтэрэлээх, кытылтан киирэр сирин кытта 0,95 км) өрүстэри туоруур муосталары саҥаттан тутар-таҥар үлэтэ кулун тутар ортотуттан саҕаланара былааннанар.

Сунтаар улууһугар Улахан Харыйалаах өрүскэ сыбаайалары туруорар уонна эргэ муостаны көтүрэр  үлэлэр түмүктэннилэр, билигин суолу оҥоро сылдьаллар. Өлүөхүмэ улууһун Дьороху өрүһүгэр тутуу сүрүн матырыйаалларын тиэрдии уонна атыылаһыы үлэтэ барар.

Маны таһынан, Суол управлениета “Умнас” трассаҕа Аччыгый Черепаниха (72,72 пог. миэтэрэ) уонна Улахан Черепаниха (112,25 пог. м.) өрүстэр муосталарын, ону тэҥэ “Анаабыр” суолугар Бүлүү өрүһү туоруур муостаны (333,3 пог. м.) өрөмүөннүүр былааннаах.