Ыты учуокка туруорбатаххына ыстарааптаныан…

Саха Өрөспүүбүлүкэтигэр ыттары булгуччулаахтык учуокка туруоруу саҕаланна. Бу ирдэбил «Кыыллары кытта эппиэтинэстээхтик сыһыаннаһыы туһунан» федеральнай сокуоҥҥа олоҕуран ылылынна. Сокуону тутуспатах хаһаайыттарга ыстараап көрүллэр, диэн СӨ Бэтэринээрийэ управлениетын пресс-сулууспата суруйар.

Ол курдук, 2023 сыл алтынньы 23 күнүттэн «Кыыллары булгуччулаахтык бэлиэтээһин (регистрация) туһунан» СӨ сокуона күүһүгэр киирбитэ. Сокуон чэрчитинэн, өрөспүүбүлүкэ бары ыттара булгуччулаахтык учуокка туруохтаахтар. Ирдэбил ирдэбил «Кыыллары кытта эппиэтинэстээхтик сыһыаннаһыы туһунан» 498-ФЗ №-дээх Ффедеральнай сокуоҥҥа олоҕурар.

Учуокка ханна туруоруохха сөбүй?

Кыыллары учуокка туруоруу үлэтэ улуустааҕы бэтиринээрийэ управлениетын учаастактарыгар уонна пууннарыгар ыытыллар. Холобур, Горнай улууһун олохтоохторо улуустааҕы бэтиринээрийэ управлениетын үлэ чааһыгар тиийэн сиһилии билэ-көрө, кыылларын учуокка туруортараллар. Исписэлиистэр хас биирдии киһиэхэ көмөлөһүөхтэрэ.

Учуокка туруоруу хайдах ыытылларый?

Бэлиэтээһин кэмигэр ыкка анал микрочип олордуллар, оттон кыыл уонна кини иччитин туһунан сибидиэнньэлэр биир кэлим электроннай баазаҕа киллэриллэллэр.

Микрочип диэн тугуй?

Микрочип — ириис курууппа туорааҕын саҕа кыра электроннай капсула. Ыт тириитин анныгар ыарыыта суох укуолунан киллэриллэр. Тэрил кыыл ханна сылдьарын кэтиир аналлаах буолбатах, ханнык да сигналлары тарҕаппат онна доруобуйаҕа букатын куттала суох. Сүрүн соруга — ыты  чопчу быһаарыы. Ол эбэтэр, ыт сүтэн хааллаҕына, микрочип нөҥүө иччитин түргэнник булан, төннүннэрэргэ көмөлөһөр.

Өҥө төлөбүрдээх дуо?

Учуокка туруоруу босхо оҥоһуллар. Төлөбүр микрочип сыанатыгар эрэ ылыллар.

Быһыы туһунан болҕойуҥ!

Кыылы учуокка туруоруу ииримтийии ыарыытын утары күүһүгэр сылдьар быһыылаах буоллаҕына эрэ оҥоһуллар. Өскөтүн быһыыта суох буоллаҕына, тутатына миэстэтигэр оҥотторуохха сөп.

Туох эппиэтинэс көрүллэрий?

Учуокка туруорууттан аккаастанар эбэтэр ирдэбили кэстэххэ, Саха Өрөспүүбүлүкэтин Административнай кэһиилэр туһунан 5.3 ыстатыйатынан эппиэтинэс көрүллэр. Ыстараап кээмэйэ:

• Гражданнарга: 1 000 солк. саҕалаан 5 000 солк. диэри;

• Дуоһунастаах сирэйдэргэ: 5 000 солк. саҕалаан 10 000 солк. диэри;

• Юридическай сирэйдэргэ: 20 000 солк. саҕалаан 50 000 солк. диэри.

Бэтиринээрийэ исписэлиистэрэ хаһаайыттары учуокка туруорууну уһаппакка, тапталлаах ыттарыгар эппиэтинэстээхтик сыһыаннаһарга ыҥыраллар.