Үтүө киһи аата үйэлэргэ умнуллубат

Константин Егорович Тимофеев Саха Өрөспүүбүлүкэтин тыатын хаһаайыстыбатын үтүөлээх, Арассыыйа агропромышленнай комплексын бочуоттаах үлэһиттэрэ, Арассыыйа бочуоттаах фермерэ, Саха Өрөспүүбүлүкэтин бааһынай хаһаайыстыбаларын уонна тыа хаһаайыстыбатын кээпэрэтииптэрин ассоциациятын сэбиэтин бэрэссэдээтэлэ, «Кээникээн» хааччахтаммыт эппиэтинэстээх уопсастыбаннай тэрилтэ генеральнай дириэктэринэн таһаарыылаахтык үлэлээбитэ.

Константин Егорович өрөспүүбүлүкэ таһымнаах «Сахаагропродукт» тэрилтэни хара ааныттан тэрийэн, быраҕыллан турар улахан объегы сөргүтэн, переработка сыаҕын тэрийэн, ол иһигэр дьон сылдьар – аһыыр, үчүгэй, тупсаҕай көстүүлээх остолобуойун арыйан, тыа улуустарын соҕотуопка тэрилтэлэрин үлэһиттэрин, бааһынай хаһаайыстыбаларын, үлэ – хамнас, тыа хаһаайыстыбатын бородууктатын батарыы боппуруостарыгар элбэхтик сылдьар, сүбэлэһэр, санаа атастаһар тэрилтэлэрин оҥорбута. Куорат киинигэр элбэх сиргэ «Сахаагропродукт» диэн ааттаах лавкалары астарбыта, онно ханнык улуустарын ыйан туран, эт уонна сылгы, ынах буотарактара, үүттэн оҥоһуллубут аһылыктар сүөгэй, суорат, кефир, иэдьэгэй, олохтоох халбаһыылар атыыланалларын улуустарын, дойдуларын аһын ахтыбыт куорат олохтоохторо үөрэ-көтө хамаҕатык атыылаһар этилэр.

Бу кэмнэргэ «Сахаагропродукт» тэрилтэни кытары бородууксуйаны батарыы боппуруостарыгар улуус тыа хаһаайыстыбатынан дьарыктанар, бааһынай тэриллиилээх хаһаайыстыбалар уонна кээпэрэтииптэр ыкса сибээстээхтик үлэлээбиттэрэ. Саха Өрөспүүбүлүкэтин бааһынай хаһаайыстыбаларын уонна тыа хаһаайыстыбатын кээпэрэтииптэрин ассоциацията тыа улуустарыгар тыа хаһаайыстыбатын сайдыытыгар тыа сирин бары хайысхатыгар табаары оҥорооччулары кытары ситимнээх үлэни ыытар этэ, ол курдук бу үлэни-хамнаһы тэрийэргэ Константин Егорович ассоциация бэрэсидьиэнин Александр Еремеевич Артемьевы кытары элбэх өрүттээх үлэни ыытаннар, улахан сэргэхсийиини таһаарбыттара.

Константин Егорович Үөһээ Бүлүү улууһун баһылыгын бастакы солбуйааччытынан үлэлии олорон, улуус социальнай-экэнэмиичэскэй сайдыытыгар элбэх өрүттээх үлэни ыыппыта. Кинини кытары ол кэмнэргэ тыа хаһаайыстыбатын управлениетын начаалынньыгынан үлэлиир буоламмын, тыа нэһилиэктэригэр элбэхтик тыа хаһаайыстыбатын боппуруостарыгар командировкаҕа сылдьан, дьону-сэргэни кытта кэпсэтэн, боппуруостары быһаарсан, ол иһигэр элбэх үлэ-хамнас хайысхаларыгар сыалбытын-сорукпутун тиһэҕэр тиэрдэн, олоххо киллэрэн кэлэр этибит.

Константин Егорович киһи быһыытынан көнө, судургу майгылаах, салайааччы быһыытынан ирдэбиллээх, үлэтигэр-хамнаһыгар улахан эппиэтинэстээх, Саха Саарына, Киһи Кэрэмэһэ этэ. Кини албыны-көлдьүнү сөбүлээбэт, чиэһинэй киһи, салайааччы буоларынан дьон-сэргэ ытыктабылынан туһанара.

Элбэх сылларга үлэ-хамнас боппуруостарыгар алтыспыт, биир кэмҥэ Үөһээ Бүлүү улууһун дьаһалтатыгар үлэлээбит, быраатым курдук саныыр доҕорум Константин Егорович Тимофеев олохтон эрдэ туораабатаҕа буоллар тыа хаһаайыстыбатын сайдыытыгар элбэҕи оҥоруо, айыа-тутуо хааллаҕа. Киһи улаханнык хомойоро, дьылҕа хаан быһаарыытынан, кини курдук ньуура суох үлэһит, үчүгэй тэрээһиннээх, сатабыллаах салайар дьоҕурдаах, сахатын дьонугар элбэҕи, үчүгэйи оҥоруох дьон эрдэ олохтон бараллара. Ол эрэн, кинилэр үлэлиир-хамныыр кэмнэригэр тыа хаһаайыстыбатын сайдыытыгар үчүгэйдик үлэлээбиттэрин, элбэҕи оҥорбуттарын дьон-сэргэ өйдүө-саныа, умнуо суоҕа дии саныыбын.

Үөһээ Бүлүү улууһун Балаҕаннаах нэһилиэгин муниципальнай тэриллиитин баһылыга,

Саха Өрөспүүбүлүкэтин норуотун хаһаайыстыбатын үтүөлээх үлэһитэ,

1995-2011 сылларга Үөһээ Бүлүү улууһун тыатын хаһаайыстыбатын управлениетын салайаччы Дмитриев С.И.

19.01.2023 с.