Тэрээһин кыттыылаахтара. Хаартыскаҕа А.Слепцов түһэриитэ
Кулун тутар 10 күнүгэр Чурапчы улууһун дьаһалтатын мунньахтыыр саалатыгар сэргэх тэрээһин буолла.
Сэбиэскэй-партийнай үлэһит, Саха Өрөспүүбүлүкэтин норуотун хаһаайыстыбатын үтүөлээх үлэһитэ, Тыатын хаһаайыстыбатын, судаарыстыбаннай сулууспатын, телевидениетын уонна араадьыйатын туйгуннара, Чурапчы, Булуҥ улуустарын Бочуоттаах гражданина Агафья Семеновна Птицынаны ахтар-саныыр, кини туһунан «Норуокка анаммыт олох» диэн кинигэ биһирэмэ буолла.
Агафья Семеновна Чурапчы улууһугар 1984-1991 сс. ССКП райкомун сэкирэтээринэн үлэлээбитэ, идеология эйгэтин салайбыта. Кини үлэлиир кэмигэр чурапчылары хоту көһөрүү боппуруоһун үөрэтэн норуот билиитигэр таһаарыыны саҕалаабыта. Көһөрүллүү кыттыылаахтарыгар араас өрүттээх чэпчэтиилэри оҥорууну өрөспүүбүлүкэ салалтатыгар туруорсубута. Ити кэмтэн элбэх ыстатыйалар, кинигэлэр бэчээттэнэн барбыттара, мунньахтар, араас дьаһаллар ыытыллыбыттара.
Бу тэрээһиҥҥэ кыттыыны ыла кэлбиттэр күн бастакы аҥаарыгар Хатылы нэһилиэгэр Көһөрүллүү музейыгар сырыттылар. Итиннэ Агафья Семеновнаҕа анаммыт экспозицияны, көһөрүллүүгэ анаммыт эспэнээттэри көрдүлэр.
Дьаһалта дьиэтигэр Агафья Семеновнаны кытары бииргэ үлэлээбиттэр, көһөрүллүү кыттыылаахтара, тэрилтэлэртэн бэрэстэбиитэллэр сааланы тобус-толору муһуннулар. Чурапчытааҕы киин бибилэтиэкэ үлэһиттэрэ фойеҕа Агафья Семеновнаҕа анаан туруорбут быыстапкаларын билистилэр.
Кинигэни сүрэхтиир мунньаҕы улуус дьокутааттарын сэбиэтин бэрэссэдээтэлэ Афанасий Захаров аста. Салгыы кинигэ тутулун, ис хоһоонун туһунан киин бибилэтиэкэ сэбиэдиссэйэ Вера Платонова билиһиннэрдэ.
Агафья Семеновна бииргэ төрөөбүттэрэ, аймахтара, бииргэ үөрэммиттэрэ сценаҕа тахсыылара ытыс тыаһынан доҕуһуолланна. Балта Татьяна Птицына кинигэ суруллуута хайдах барбытын билиһиннэрдэ, кинигэни хомуйан оҥорбут Татьяна Обулаховаҕа махтанна. Кинигэ 2020 сыллаахха бэчээттэнэн баран пандемиянан сибээстээн киэҥ араҥаҕа биһирэмэ буолбатаҕын эттэ. Агафья Семеновна оҕо сааһыттан саҕалаан истиҥ-иһирэх ахтыылары оҥордулар.
Бу кэнниттэн сценаҕа Чурапчыга бииргэ үлэлээбиттэрэ, Дьокуускайга тыа хаһаайыстыбатын министиэристибэтигэр бииргэ үлэлээбиттэрэ, «Саха» НКИХ бииргэ алтыспыттара, хоту көһөрүллүү кыттыылаахтара тус-туһунан бөлөҕүнэн тахсан ахтыы оҥордулар. Кинилэр Агафья Семеновна үлэһит, салайааччы быһыытынан дьоҕурун, талаанын бэлиэтээтилэр, дьоҥҥо үтүө сыһыанын, эйэҕэс майгытын, улахан өйөбүлүн эттилэр.
Улуус салалтата, Агафья Семеновна бииргэ төрөөбүттэрэ, аймахтара кинигэ суруйуутугар үлэлээбиттэргэ дириҥник махтанан туран наҕараадалары, бэлэхтэри туттардылар.
Алексей Слепцов,
Чурапчы.
Өрөспүүбүлүкэтээҕи "Оһуокай" түмсүү Дархан этээччитэ Лариса Николаевна оскуола үөрэнэччилэрин дьарыктаабыта ыраатта. Туйах хатарааччылаах бастыҥ этээччибит…
Айсен Николаев Олоҥхо тыйаатырын Саха сирин норуоттарын култуурунай баайын эбийиэгинэн билинэр туһунан Ыйаахха илии баттаата.…
Дьокуускайга 4 №-дээх полиция отделын дьуһуурунай чааһыгар дьахтар суумкатын уордарбытын туһунан сайабылыанньа суруйбут. Кини киин…
Алааска, тыаҕа сылдьан хаһыытыыры, улаханнык айдаарары боболлорун билэргит буолуо. Ону таһынан өссө тугу сэрэтэллэрий, өйдөтөллөрүй?…
Айсен Николаев Судаарыстыбаннай Мунньахха (Ил Түмэҥҥэ) туһаайан этиитигэр дьиэ кэргэннээх үлэһиттэри өйүүр миэрэлэри олоххо киллэрэргэ…
Үгүс үбүлүөйдээх тэрээһиннэринэн баай Өлүөхүмэ улууһун 1-Нөөрүктээйитээҕи модельнай бибилэтиэкэҕэ, ааспыт нэдиэлэҕэ сылы түмүктүүр тэрээһин буолан…