«Үтүө санаа харыйата» аахсыйаҕа 3 тыһыынча кэриҥэ киһи кытынна

2023 сыл үүнээри турдаҕына, Саха сиригэр «Үтүө санаа харыйата» диэн аһымал аахсыйа сэттис төгүлүн ыытылынна. Быйыл бу бырайыак Ил Дархан сорудаҕынан кэҥээбитэ —  коррекционнай оскуолалар иитиллээччилэригэр эрэ буолбакка, анал байыаннай дьайыы кыттыылаахтарын оҕолорун баҕа санаалара толоруллубуттара.

— Улахан үлэ ыытылынна. Биһиэхэ саамай улахан наҕараада — оҕолор үөрбүт-көппүт сирэйдэрэ, төрөппүттэр уонна иитээччилэр махталлара. Оҕолор Саҥа дьыл иннигэр баҕа санааларын суруйан, киэргэммит харыйаҕа ыйыыллар, ол ону ким баҕарар, үтүө санаалаах дьон толороллор, хаартыскаҕ түһэн баран, социальнай ситимҥэ #Елкадобра хэштеги туруоран бэлиэтэнэллэр, доҕотторун ыҥыраллар, — диэн Ил Дархан, бырабыыталыстыба дьаһалтатын салайааччы Георгий Михайлов бэлиэтээтэ.

— Бу сылларга «Үтүө санаа харыйата» аахсыйа чэрчитинэн, элбэх оҕо дьиэлэрин, коррекционнай оскуолалар, «Берегиня» оҕо дьиэтин иитиллээччилэрин уонна доруобуйаларыгар хааччахтаах оҕолор баҕа санааларын толордубут. Былырыын 900 бэлэх ылыллыбыт буоллаҕына, быйыл үс төгүл элбэх бэлэх буолла. Дьон дьиэ кэргэнинэн, кэлэктиибинэн кэлэн, баҕа санаалары толордулар. Быйыл бары улуустарга элбэх киһи кытынна, — диэн аахсыйа тэрийээччи, «Үтүө санаа куората» уопсастыбаннай түмсүү бэрэссэдээтэлэ Галина Коротова уонна бырабыыталыстыбаттан куратор, ЗАГС управлениетын салайааччытын солбуйааччы Дария Слепцова кэпсээтилэр.

Георгий Михайлов волонтердарга махтанарын биллэрдэ. Волонтердар бэлэхтэри хомуйан баран, оҕолорго быһаччы тиэрдэллэр. «Үтүө санаа куората» түмсүү волонтердара Екатерина Александрова уонна Туйаара Зверева маннык үлэ үөрүүнү эрэ аҕаларын, оҕолор үөрбүт сирэйдэрин көрөн, Саҥа дьыллааҕы дьикти түгэни үксэтээччи, ыра санааны толорооччу курдук сананалларын туһунан эттилэр.