Үтүө санаа ыллыктара

Сергей Степанович Васильев – Борогонскай аатынан улуустааҕы киин бибилэтиэкэ уонна улуустааҕы көрбөттөр уопсастыбалара “Үрүҥ торуоска” аахсыйа чэрчитинэн “Үтүө санаа ыллыктара” тэрээһини ыыттылар.

Тэрээһин киин бибилэтиэкэ ааҕар саалатыгар төгүрүк остуолтан саҕаланна. Манна пенсионнай, социальнай сулууспаттан, успуорт салаатыттан сокуоҥҥа саҥа уларыйыылар тустарынан иһитиннэриилэри оҥордулар уонна араас хабааннаах ыйытыыларга  хоруйдаатылар.

Бу күн бибилэтиэкэ “Дьиэ кэргэн” национальнай бырайыагынан ылбыт электроннай лупалара сүрэхтэннэ. Олус наадалаах лупаны кэлбит ыалдьыттар сэргээтилэр, кинигэни, хаһыаты ааҕарга табыгастааҕын биһирээтилэр.

Көрбөттөр уопсастыбаларын бэрэссэдээтэлэ Аммосов Д.В. ааспыт сайын биһиги улууспутугар ыытыллыбыт илин эҥэрдээҕи “Современная северная мозаика” бэстибээл, уопсай ситиһиилэр тустарынан кэпсээтэ. Басыгысова И.К., Гоголева В.М., Попова Е.Ф. дьиэҕэ олорор киһи илиититтэн саҕалаан араас хамсаныылары оҥорон доруобуйаларын тупсаралларыгар көрдөрөр-иһитиннэрэр сүбэлэрин биэрдилэр, оонньоттулар. Уопсастыба биир көхтөөх чилиэнэ Степанова А.Е. бэйэтин дьарыгын сэһэргээтэ, айан таһаарбыт хоһооннорун, ырыаларын хомуурунньуктарын сырдатта.

Салгыы ыалдьыттар итии чэй истилэр, ирэ-хоро сэһэргэстилэр, оонньоон-көрүлээн сэргэхсийдилэр. Ол курдук “Эрудиты” викторинаҕа, “Угадай мелодию”, “Игра на ощупь”, мээчиги быраҕыы, Катамино күрэстэргэ оонньоотулар, грамотанан уонна сэртипикээтинэн наҕараадаланнылар.

Уопсастыба чилиэннэрэ тэрийээччилэргэ олус махтанан, үтүө баҕа санааларын этэн, өссө да кэлиэх буолан тарҕастылар.

Үтүө сырдык санаа, истиҥ сыһыан киһи олоҕор олус күндү, күүскэр күүһү, эрэли эбэр, инники олоххо суолдьут сулус буолар. Ханна да, хайдах да кэмҥэ бэйэ-бэйэбитигэр харыстабыллаахтык сыһыаннаһыахха, үтүөнү баҕарыахха, эйэлээх буолуохха.

Татьяна Бурцева, бибилэтиэкэр,
Бороҕон, Уус Алдан.
Хаартыскаларга Татьяна Бурцева түһэриитэ