Үтүө санаа ымыыта — волонтер оҕолорго

«Саха волонтердара» хамсааһын ыстааба бииргэ үлэлэһэр волонтердарыгар аналлаах ымыылаахтар – үтүө санаа уонна аһыныгас буолуу бэлиэтэ — альбинос Чебурашка.

Бу күннэргэ «Саха волонтердара» үтүө санаа ымыытын Үөһээ Бүлүү улууһун волонтердарыгар ыыттылар, бу туһунан кинилэр телеграмм-ханаалларыгар иһитиннэрдилэр.

«Биһиги махталбыт бэлиэтин ымыыбытын 1-кы кылаас үөрэнээччитигэр Олег Захаровка уонна 6-с кылаас салайааччытыгар Сардаана Петровна Адамоваҕа бэлэхтээтибит. Анал байыаннай дьайыыга сылдьар байыастар ааттарыттан гуманитарнай көмөҕүт иһин махтал тылларын тиэрдиэхпитин уонна эһиги оҥорор үлэҕит, ыытар баһыылкаҕыт бааһыран госпиталларга сытар уолаттарга олус улахан суолталаах диэн этиэхпитин баҕарабыт!», — диэн «Саха волонтердара» махталларын тиэрдэллэр.

Волонтердар Саха сириттэн кэлбит кэһиилэри илдьэ, госпиталга тиийдэхтэринэ, уолаттарбыт күүстэригэр күүс эбиллэр, байыаннай дьайыыга да, тыылга да буоллун, кинилэр соҕотох буолбатахтарын, дойдуларыгар күүтэллэрин, өйүүр дьон өйдүүллэр.