Үтүө санаалаах дьон көмөтө туохтааҕар да күндү

Дойду киин куораттарын госпиталларыгар эмтэнэ сытар биир дойдулаахтарбытыгар «Саха волонтердара» хамсааһын волонтердара олус улахан көмөнү оҥороллор. Бааһыран эмтэнэ сытар уолаттарга ас-таҥас, наадалаах күннээҕи туттар мал-сал, о.д.а. тиһигин быспакка тиэрдэллэр.

Бу күннэргэ төрдүс волонтерскай сезоҥҥа «Саха волонтердара» хамсааһын волонтердара үтүө санаалаах дьон ыытар харчыларынан минньигэс астары атыыластылар. Дойдуларыттан ыраах, эмтэнэ сытар дьоҥҥо кыра да көмө күндү буолара биллэр. Онуоха балыыһа аһа хайдаҕын бары да сэрэйэр буолуохтааххыт. Оттон дойдуларыттан тиийэр амтаннаах ас кинилэр доруобуйалара тупсарыгар күүстэригэр күүс эбиллэригэр, сэниэ киллэрэллэригэр олус көмөлөөх.

«Саха волонтердара» этэллэринэн, бэс-от ыйдарыгар көмө киириитэ олох аҕыйаабыт. Онон үтүө санаалаах дьон кыра да көмөнү оҥороргут буоллар, кыайыы туһугар кылаат буолуо этэ. Бу киирбит үп-харчы барыта отчуоттанар. «Саха волонтердара» сайыҥҥы үс ый отчуотун балаҕан ыйын саҥатыгар таһаарыахпыт диэн иһитиннэрэллэр.

«Биһиги үтүө дьыалабытыгар ис сүрэхтэриттэн кыттыһар, уолаттарбытын көмөлөһөр дьоҥҥо, барҕа махталбытын тиэрдэбит!», — дииллэр «Саха волонтердара».