Үтүө санаалаах норуот эмчиттэрэ – Кэбээйи сиригэр

Бу күннэргэ Кэбээйи нэһилиэгэр үтүөнү түстүүр аналлаах «Арассыыйа эмчиттэрин конфедерацията» түмсүү эмчиттэрэ байыаннай дьайыыга сылдьар уолаттарбыт чугас дьоннорун эмтээн, ыраастаан аастылар.

Күнтэн тэһииннээх үтүө санаалаахтар кимнээхтэрий диэтэххэ, Арассыыйа норуодунай эмчиттэрин сойууһун Саха сиринээҕи салаатын бэрэссэдээтэлэ, норуот эмчитэ, алгысчыт Вероника Николаевна Семено­ва-Хомусчаана уонна түмсүү чилиэттэрэ, норуот эмтээһинин туйгуннара Сардаана Николаевна Гаврильева–Ил Эйэ, Андрей Васи­льевич Констан­тинов буолаллар.

Маннык үтүө соругу толорорго анаммыт, байыаннай дьайыыга сыл­дьар уолаттар дьоннорун кытта үлэлэһэр куратор Ирина Попованы көр­сөм­мүн кэпсэттим:

«Норуот эмчиттэрин Кэбээйи бөһүөлэгэр ыҥырар туһунан улууспут биир баар-суох, «дойдум дьонугар үтүөнү оҥорбут киһи» диэн санаалаах үлэ­лиир, сүүрэр-көтөр общественницабыт, волонтербут Светлана Алек­сеевна Жиркова тыл көтөхпүтэ, — диир Ирина Олеговна. — Ыалдьыттары Кэбээйитээҕи вра­чебнай амбулаторияҕа түһэрэн, эмтиир хосторун бэлэм­нээбиттэрэ. Бэйэлэрэ үлэлэрин «Сайдам” норуот айымньытын дьиэтигэр байыаннай дьайыы уолат­тарын чугас дьонун кытта көрсүһүүттэн, кэпсэтииттэн, арчы­ланыыттан саҕалаабыттара. Норуот эмчиттэрэ массаас араас көрүҥүн, илбийии, түөннээһин, хааннааһын ньымаларын туттан байыастар төрөппүттэрин, кэргэттэрин, оҕолорун, чугас дьоннорун буор-босхо эм­тээн-томтоон, ыраастаан, сиэри-туому толору туттан, күүстээх эрэли саҕардыы үлэлээтилэр.

Дьон-сэргэ олус чэпчээн, санаалара көнньүөрэн эмчиттэргэ махтанан, нэһилиэкпит дьаһалтатын аатыттан үтүөнү саҕар дьоннорбутугар махтал тыллары анаан, бэлэхтээн атаардыбыт».

Ирина Олеговна кэпсииринэн, байыаннай дьайыыга сылдьар уолаттар дьонноро эмчиттэри сахалыы астаан-үөллээн аһатан, күндүлээн, мааны­лаан илдьэ сылдьыбыттар. Олохтоох дьаһалта (баһылык И.И.Левин) эмчит­тэр кэлэр-барар айаннарын төлөбүрүн, бөһүөлэк иһигэр дьиэнэн сылдьан эмтээһин төттөрү-таары сырыытын уйунан күүскэ көмөлөспүт. Кэбээйитээҕи врачебнай амбулатория (кылаабынай быраас З.С. По­лятин­ская, улуус кылаабынай бырааһа Д.В. Варфоломеева) бу үтүө хамсааһыҥ­ҥа көмөлөрө ураты истиҥин куратор бэлиэтээтэ.

“Эмчиттэри күүстээх үлэ кэнниттэн кыраайы үөрэтэр түмэлбитигэр сырытыннаран, туох дьонноох, туох дьарыктаах нэһилиэк буоларбытын көрдөрдүбүт, билиһиннэрдибит. Бу кэлэн барыылара чахчы туһалааҕын, муҥура биллибэт махталлааҕын билиннибит”, — диэн Ирина Олеговна кэпсээнин түмүктүүр.

Суруйуубун эмчиттэр билинии суруктарынан түмүктүүбүн:

“Кэрэ мааны айылҕалаах, үтүө дьонноох-сэргэлээх, Ытык Мааны Кэбээйи сиригэр Ийэлии истиҥник көрсүбүккүтүгэр, күн уотун сарда­ҥатын үөрэ ыспыккытыгар, сайа охсор ыраас салгыҥҥытынан сылаастык кууспуккутугар, үтүө сыһыаҥҥыт, минньигэс тотоойу аскыт иһин барыгытыгар махтанабыт. 0лох кытаатан эрдийэн, төбөҕүтүн өрө көтөҕөн, дьоһуннук дьоллоохтук олоруҥ. Бэйэ-бэйэҕитин өйөнсөн, көмөлөһөн дьоммут баҕа санааларын толорон иллээхтик-эйэлээхтик, кинилэри хомоппот курдук чэгиэнник-чэбдиктик оолруҥ. Хас биир саллаат Герой, ону умнубакка кинилэр ааттарын үйэтитэн, үтүө өйдөбүлү үөскэтэн кэнчээри ыччаттары дьоһуннук иитэн улаатыннарыҥ. Барыгытыгар ситиһиини, эйэлээх олоҕу, кытаанах доруобуйаны баҕарабыт».

Татьяна Максимова-Лазарева