Үтүө сүрэх сылааһа: халаантан эмсэҕэлээбит улуустарга 600 тыһ. солк. хомуйдулар

Ааспыт нэдиэлэҕэ Дьокуускайга ыытыллыбыт аһымал кэнсиэр уонна хартыына аукционун түмүгүнэн ардах халааныттан эмсэҕэлээбит улуустарга көмөҕө 600 тыһыынча солкуобай хомулунна. Үтүө дьыаланы СӨ Бырабыыталыстыбатын бэрэссэдээтэлин бастакы солбуйааччыта Дмитрий Садовников көҕүлээтэ.

Ураты тэрээһини СӨ Бырабыыталыстыбатын Инфраструктураҕа, куттал суох буолуутун уонна табыгастаах эйгэни сайыннарар салаата тэрийэн ыытта. Тэрийээилэр эрээһини ардах халаанын содулуттан эмсэҕэлээбит Өймөкөөн уонна Абый улуустарын олохтоохторугар анаатылар. Хомуллубут үп-харчы барыта, 600 тыһыынча солкуобай, эмсэҕэлээбит улуустар бэрэстэбиитэллэригэр номнуо туттарыллыбыт. Тэрийээччилэр кэнсиэргэ кэлбит көрөөччүлэргэ, хартыына аукционугар көхтөөхтүк кыттан үтүө дьыалаҕа кылааттарын киллэрбит бар дьоҥҥо дириҥ махталларын тиэрдэллэр.

«Күндү кыттааччылар, айар талааҥҥыт уонна үтүө сүрэххит иһин махтанабыт!» – диэн «Архитектура Якутии/LETO» ТГ-ханаалга суруйаллар. Бу тэрээһин биир сомоҕо буолуу бэлиэнэн буолла — ускуустуба дьоно уонна олохтоохтор бары кыттыһан, биир дойдулаахтарыгар өйөбүл оҥордулар.