Үтүөкэн тириэньэр

Уус Алдан Кэптэнитэ былыр былыргыттан күүстээхтэринэн биллибит дьонноох-сэргэлээх, туохтан да толлубатах хорсун буойуттардаах, албан аатырбыт үтүөкэн үлэһиттэрдээх, өрөспүүбүлүкэ биир киэн туттар улууһа буолар.

Ол курдук аар саарга аатырбыт Күүстээх Уйбаан, Мас Мэхээлэ уонна да атыттар. Дыгын оонньуутун 7 төгүллээх муҥутуур кыайыылааҕа, аан дойду күүстээхтэрин тааһы көтөҕүүгэ иннигэр түһэрбэтэх буулаҕа бухатыыр Уйбаан Бөлөнүүскэй төрүттэрэ-уустара эмиэ бу түөлбэҕэ төрүттэммитэ.

Бүгүн мин кэпсиэхпин баҕарар киһим эмиэ бу түөлбэттэн төрүттээх Жирков Виталий Николаевич диэн саха саарына буолар. Мин Виталийдыын биир дойдулаахпыт. Өссө ону таһынан сопхуос ыһыллыытын ыарахан сылыгар мин салайар учаастакпар оскуоланы саҥа бүтэрэн баран УАЗ массыынаҕа суоппарынан үлэлээбитэ. Аҕата сааһын тухары мэхэньисээтэр. Кэлин сопхуоска мэхээнньигинэн үлэлээбитэ.

Битээлий бэйэтэ оччолортон сытыы-хотуу, олохтоох тыллаах-өстөөх уолчаан этэ. Виталий 6 оҕолоох ыал аҕата куоракка көһөн киирэн дьиэ-уот тэринэн, дьоллоох Дьокуускай куорат элбэх оҕолоох биир бастыҥ ыала буола түһэр. Кини оҕо эрдэҕиттэн успуордунан, чуолаан көҥүл тустуунан үлүһүйэн туран дьарыктанар. Ол иһин, бэйэтигэр сыал-сорук туруорунан, эдэр ыччаты дьарыктыырга анаан «Ситим» диэн тустууга успуорт кулуубун тэринэр. Виталий манна айылҕаттан бэриллибит куруук саҥаны, сонуну көрдүүр, була-тала сатыыра таайан, өрөспүүбүлүкэ үрдүнэн бэйэтэ талан, сүүмэрдээн, тириэньэрдэри, төрөппүттэри кытта сүбэлэһэн, тустуон, сайдыан баҕалаах оскуола оҕолорун уонна ыччаты түмэр. Тустуу муҥутаан сайдыбыт сирдэригэр, Кавказка,  Бурятияҕа, Тываҕа, Красноярскайга, Киргизияҕа уонна да атын элбэх сиргэ, араас куораттарынан сылга иккитэ баран дьарыктаабыта уонча сыл буолла. Барар-кэлэр айаннарын, туох баар орускуоттарын барытын бэйэлэрэ уйуналлар. Бу эттэххэ дөбөҥ.

Манна барытыгар сүүрүү-көтүү, үп-харчы көрдөөһүнэ, оҕолору аһатарга, хоннорорго дьиэ-уот булуута, тиийэн эрчиллэр саалаларын быһаарсыы, эрчиллэр күннэрин чуолкайдааһын соҕотох Битээлий сатабыллаах кэпсэтиитинэн быһаарыллар. Оттон оҕолорго барыта саҥа сонун, үрдүк кылаастаах спортсменнары бэлэмнээн таһаарбыт тириэньэрдэр салалталарынан эрчиллэн, онно эбии аан дойду таһымыгар туста сылдьар спортсменнары кытта бииргэ эрчиллэн, оҕолор санаалара бөҕөргүүр, тустууга оҥорор албастара эбиллэр уонна чочуллар. Быһаччы эттэххэ, сайдан, эбиллэн кэлэллэр. Өссө эрчиллиини таһынан араас спортсменнары көрөллөр, култуура тэрээһиннэригэр сылдьаллар.

Кырдьык даҕаны, Виталий оҕолор сайдаллар диэн үөрэн бэлиэтииригэр сөбүлэһэбин уонна өссө биири бэлиэтиибин. Биир төбө үчүгэй, онтон икки төбө өссө үчүгэй диэн этиллэрин курдук, бу Виталий саҕалаабыт хамсааһынын өрөспүүбүлүкэ салалтата таба көрөн, болҕомтоҕо ылан, сыллааҕы былааҥҥа киллэрэн туран, үбүлээһин боппуруоһун быһаараллара буоллар саха тустуута саҥа таһымҥа тахсарыгар тирэх буолуо этэ дии саныыбын. Тустуубут тула түмсүөҕүҥ, эдэр ыччат үүнэн-сайдан тахсарыгар, Сахатын сирин аан дойдуга аатырдарыгар кыахта биэриэҕиҥ, эрдэттэн болҕомтоҕо ылан өйүөҕүҥ.

 

Иван Сивцев-Бээди,

успуорт бэтэрээнэ.

Хаартыска Виталий Жирков альбомуттан