«Үтүөлээх суруналыыстар» ааттара билиннэ

Ахсынньы 13 күнүгэр Арассыыйаҕа Бэчээт күнэ бэлиэтэнэр. Бэлиэ күн 1991 сылтан бэлиэтэнэр. Бу күн Арассыыйаҕа бастакы хаһыат тахсыбыт күнүн кытары сибээстээх. Ол курдук, 1703 сыл тохсунньу 13 (2) күнүгэр ыраахтааҕы Петр I ыйааҕынан “Ведомости” хаһыат бастакы нүөмэрэ тахсыбыта. Хаһыат аата «Ведомости», «Российские ведомости», «Ведомости Московские» диэн уларыйа сылдьыбыта.

Бэчээт күнүгэр суруналыыстары, бэчээт үлэһиттэрин идэлээх бырааһынньыктарынан эҕэрдэлииллэр. Быйыл “СӨ үтүөлээх суруналыыһа” үрдүк ааты “Сахамедиа” холдинг шеф-эрэдээктэрэ Федор Григорьевка уонна “Саха” көрдөрөр-иһитиннэрэр хампаанньа эпииринэн көрдөрүү дирекциятын режиссера Фенна Пластининаҕа иҥэрдилэр.

“СӨ үтүөлээх суруналыыһа” аат 2018 сыллаахха олохтоммута. Бу кэмтэн суруналыыстар Иван Гаврильев, Сардаана Сивцева, Данил Макеев, Алена Докторова, Борис Павлов, Надежда Егорова, Дмитрий Аргунов, Александр Веревкин, Акулина Харбаева, Руслан Павлов, Елена Потоцкая, Нина Герасимова, Дарья Ермолаева, Иван Чагдинскай ылбыттара.