Хаартыска: Людмила Попова.
Мэҥэ Хаҥалас улууһун Майа сэлиэнньэтигэр ыытыллыбыт “Оҕо ийэ тылынан тылланыыта – дойдубут соруга” өрөспүүбүлүкэтээҕи сугулаан чэрчитинэн, оҕолорун сахалыы иитэр эдэр ыаллары сырдатар, өйүүр соруктаах “Ытык чыыбыстаан” видеонан күрэс түмүгүн таһаардылар. Кыайыылааҕынан кимнээх буоллулар?
Күрэһи Үөрэх уонна билим министиэристибэтэ, “Ийэ тыл кэскилэ” уопсастыбаннай тэрилтэ, Мэҥэ Хаҥалас улууһун дьаһалтата көҕүлээн, “Барҕарыы” пуонда өйөөн ыыттылар. Балаһыанньаҕа олоҕуран, күрэскэ 5 саастарыгар диэри оҕолоох эдэр ыаллар кытынныахтаахтар, оҕолорун хайдах сахалыы иитэллэрин 7 мүн. иһигэр видеоҕа устан көрдөрүөхтээхтэр. Тэрийээччилэр иһитиннэрбиттэринэн, өрөспүүбүлүкэ араас улуустарыттан барыта 21 үлэ киирбит.
“Ийэ тыл кэскилэ” өрөспүүбүлүкэтээҕи хамсааһын салайааччыта Вилюяна Никитина, “Барҕарыы” пуонда исписэлииһэ Ася Степанова үрдүк сыанаттан кыайыылаахтарга бириистэри туттардылар. Бастакы үрдүлгэ Мэҥэ Хаҥалас улууһуттан Самсоновтар таҕыстылар. Чаҕыл 4 саастаах, кырачаан кыыстара 1 саастаах.
Манна даҕатан эттэххэ, Михаил Самсонов Бүтүн Арассыыйатааҕы “Сыл бастыҥ учуутала” күрэс Саха сиринээҕи түһүмэҕэр кыттан, биэс бастыҥ учуутал кэккэтигэр киирбитэ.
Түөрт саастаах уоллара сахалыы хоп курдук саҥарар. Бүлүүттэн тиийбит эһэтэ Аркадий Самcонов: “Туох сонун?”, — диэн ыйытыытыгар – сонун суох диэн хардарарын истэр кэрэ. Аны тэрээһин саҕаланыан иннинэ, саалаҕа мустубут дьону кытта кэпсэтэригэр: “Уһуйааммар баар”, — диэн кэпсээн чуопчаарар.
“Капюшон буолбатах, чомпой”, “морозильник буолбатах, тоҥорунньук”, “мороженай диэмэ, бөһүүкэ диэ” диэн, уо.д.а. тыллары сахалыы саҥаран дьону сөхтөрдө. Аныгы кэмҥэ ити курдук уу сахалыы саҥаны улахан дьоннооҕор буолуох, кыра оҕолортон истэр букатын сэдэх. Эһэлэрэ Аркадий Михайлович элбэхтик туттуллар нууччалыы тыллары сахалыы тылбаастаан биэрбит эбит, эдэр төрөппүттэр ону тутуһан оҕолорун кытта букатын сахалыы эрэ кэпсэтэллэр. Видеоны манна көрүҥ.
Иккис үрдэли Дьокуускай куораттан Потаповтар, үһүс үрдэли Горнай улууһун Маҕараһыттан Уваровскайдар ыллылар. Оҕолорун хайдах иитэллэрин манна көрүҥ.
Төрөппүт оҕотун кытта бириэмэ аттаран элбэхтик алтыһар, кэпсэтэр түгэнигэр оҕо сахалыы саҥарар диэн үгүстэр биэлиэтииллэр. Күрэскэ үс бастыҥ миэстэни ылбыт дьон холобурун көрөн батыһыҥ, оҕолоргутун сахалыы иитиҥ.
Соторутааҕыта социальнай ситимнэринэн Алдан оройуонун олохтооҕо Рябиновай үрэх киртийбитин видеоҕа устан тарҕаппыта, ол түмүгүнэн бэрэбиэркэ…
Байыаннай дьайыы бэтэрээнэ, Аҕа дойдуну көмүскээччилэр куубактарын Бүтүн Арассыыйатааҕы финалын призера, Саха сирин олохтооҕо Алексей…
Айылҕа ураты харыстанар сирдэригэр дьиикэй кыыллары, үүнээйилэри, эбэтэр атын да уларыйыылары кэтээн көрөргө хаартыскаҕа түһэрэр…
Бүгүн, от ыйын 7 күнүгэр, күрэс төрүт көрүҥнэригэр "Манчаары оонньууларын" волонтердарын кытта көрсүһүү А.Е.Турнин аатынан…
СӨ Быыһыыр сулууспата иһитиннэрбитинэн, бүгүн, от ыйын 7 күнүгэр, сарсыарда 5.20 ч. Дьокуускай таһыгар Маҕаныыр…
Бу нэдиэлэҕэ үп-харчы эйгэтигэр ураты кэм буолуо. Үгүс бэлиэлэргэ саҥа кыахтар арыллыахтара, ол эрээри сыыһа-халты…