Ытык Күөл саҥа поликлиникатыгар биэс тыһыынчаттан тахса киһи сырытта

Сэтинньи бүтүүтүгэр Таатта улууһугар улахан үөрүүлээх тэрээһин буолбута. Ол Ытык Күөлгэ саҥа поликлиника үлэҕэ киирбитин бэлиэ күнэ дьон-сэргэ сүрэҕэр-быарыгар умнуллубаттык иҥмитэ. Дойду Бэрэсидьиэнэ Владимир Путин бу үөрүүлээх тэрээһиҥҥэ куйаар ситиминэн кыттыбыта, эҕэрдэтин тиэрдибитэ.

Эбийиэк «Доруобуйа харыстабыла» национальнай бырайыак иитинэн, улуустааҕы урукку киин балыыһа оннугар тутуллубута. Мэдиссиинэ саҥа тэрилтэтэ үлэҕэ киириэҕиттэн балтараа ый ааспыт. Бу кэм устатыгар поликлиникаҕа номнуо 5,5 тыһ. киһи сылдьыбыт.

Таатта поликлиниката — бу өрөспүүбүлүкэ улуустарыгар баар мэдиссиинэ 14 улахан эбийиэктэриттэн биирдэстэрэ. Манна даҕатан эттэххэ, бу 2026  сылга диэри салҕанар доруобуйа харыстабылын бастакы сүһүөх звенотун саҥатытан оҥоруу бырагырааматынан тутуллаллар. Манна сыһыары тутан санаттахха, бу Ил Дархан Айсен Николаев ыйааҕынан, нэһилиэнньтэ доруобуйатын тупсарыыга уонна доруобуйа харыстабылын тиһиктээх үлэтин сайыннарарга туһуланар киэҥ хабааннаах үлэнэн буолар.

Аныгы үйэ ирдэбилигэр толору эппиэттиир оҥоһуулаах саҥа поликлиникаҕа бронховидеоскоп, видеоколоноскоп уо.д.а. араас тэриллэр бааллар. Офтальмолог, отоларинголог, дерматолог, стоматолог хосторо саҥа күүстээх тэрилинэн хааччыллыбыттар. Лабораторияҕа анаалыстары оҥорор, чинчийиини ыытар аппарааттар бааллар.

РФ Бэрэсидьиэнэ көҕүлээбит «Доруобуйа харыстабыла» национальнай бырайыак иитинэн, кэнники биэс сылга Саха сиригэр элбэх мэдиссиинэ эбийиэгэ тутулунна. Олор ортолоругар өрөспүүбүлүкэтээҕи перинатальнай  уонна сүрэх-тымыр ыарыһахтары эмтиир киин, онкологическай диспансер (бастакы уочарата), оройуоннааҕы  түөрт киин балыыһа, 80 кэриҥэ амбулатория уонна биэлсэр-акушер пууннара бааллар.

Сиһилии https://www.sakha.gov.ru/news/front/view/id/3383987  ааҕыҥ.

СӨ Ил Дарханын уонна Бырабыыталыстыбатын пресс-сулууспата