Ытык Күөлгэ 1000 миэстэлээх стадион тутуллуоҕа

2024-2025 сс. Тутуу министиэристибэтэ биэрбит дааннайынан, бүгүҥҥү күҥҥэ 4 эбийиэк үлэҕэ киирбит, ол иһигэр «Үөрэхтээһин» нацбырайыагынан Кэбээйи улууһун Сайылык сэлиэнньэтин оскуолата итиэннэ Дьокуускай куоракка П.Н. уонна Н.Е. Самсоновтар ааттарынан Хатас орто оскуолатын эбии салҕааһын куорпуһа тутулуннулар. Бэлиэтээн эттэххэ, бу эбийиэктэр ааспыт сыл бүтүүтэ, былааннаммыт болдьохтон эрдэлээн тутуллан бүтэн, үлэҕэ киирдилэр.

Болдьоҕун иннинэ ааспыт сыл бүтүүтэ ситэриллэн «Доруобуйа харыстабыла» нацбырайыагынан икки эбийиэк: Муома улууһун Хонуу нэһилиэгэр симиэнэҕэ 104 киһини көрөр поликлиникалаах 22 куойкалаах үрдүттэн сытыаран эмтиир балыыһа комплекса итиэн­нэ Чурапчы улууһун киинигэр балыыһа комплексын 2-с уочарата уонна хаһаайыстыбаннай блога тутуллан үлэҕэ киирбиттэрэ.

Быйыл Саха сиригэр туох баар бары бырайыактарынан, бырагыраамаларынан, социальнай хайысхалаах 76 эбийиэк, ол иһигэр 5120 миэстэлээх 18 оскуола, 650 миэс­тэлээх 5 уһуйаан, 2 эбии үөрэхтээһин, 4 үөрэхтээһин, 10 физкултуура уонна успуорт, 20 доруобуйа харыстабылын уонна 17 култуура эбийиэктэрэ тутуллан үлэҕэ киирэл­лэрэ былааннанар.

Оттон аҥардас национальнай бырайыактарынан 2024-2025 сс. 30 социальнай эби­йиэк, ол иһигэр 2024 с. – 21, 2025 с. 9 тутуллара былааннанар. Кэлэр сылга «Үөрэхтээһин» национальнай бырайыагынан уопсайа 2640 миэс­тэлээх 13 оскуола, 315 миэс­тэлээх 4 оҕо уһуйаана, ол иһигэр Дьокуускай куоракка 570 миэстэлээх Адаптивнай үөрэхтээһин комплекса тутуллаллара былааннанар.

Итини таһынан Таатта улууһугар Манчаары оонньууларыгар бэлэмнэнэн, Ытык Күөлгэ 1000 миэстэлээх стадион итиэннэ атын даҕаны успуорт эбийиэктэрин, элбэх хайысхалаах чэбдигирдэр успуорт комплекстара, доруобуйа харыстабылын эбийиэктэрэ үлэҕэ киириэхтэрэ.