Ытык Күөлгэ Кыайыы болуоссатыгар тааҥканы туруордулар

Улуу Кыайыы 80 сылын көрсө өрөспүүбүлүкэ улуустарыгар үгүс тэрээһиннэр ыытылла тураллар.

Бу күннэргэ Таатта улууһун киинигэр Ытык Күөлгэ  Кыайыы болуоссатыгар киирэр Аарка бырайыага  бигэргэнэн, саҥалыы эскиистэнэн тутуллуоҕа.  Суолталаах үбүлүөйгэ бэлэмнэнэн, Бурятия Өрөспүүбүлүкэтин  байыаннай чааһыттан   аҕалыллыбыт 82-лээх тааҥка Кыайыы болуоссатыгар көһөрүлүннэ. Бу улахан үлэни таатталар биир дойдулаахтара Александр Ханин  салайар «Монтажник» тутуу тэрилтэтин  үлэһиттэрэ оҥордулар.

Ол курдук, кинилэр  түөрт уон туонналаах тааҥканы икки кыраанынан көтөҕөн, олохтоох сирин буллардылар. «Онон, байыаннай тиэхиньикэ үйэлээх миэстэтин булан, болуоссаппыт биир бэлиэ тэрилинэн буолуоҕа«, — диэн улуус дьаһалтатын пресс-киинэ дьаһалта телеграм-ханаалыгар суруйда.